Ka Shillong Lajong FC, ka Nangkiew Irat SC wa ka Khimusniang SC da jop suk ki ynne ha ki yalehke ka 5th Meghalaya State League.
Ynne da em leh u slap wa joor ha kylleiñ ka jylla uwa da pynchitom ya kiwa yalehke heiwa ha ka Group F ym em yoh tang u pynman ya ka yalehke hapyrdi ka Lawbah SC wa ka Mishon SSCC ha Mairang wei ya kani ka yalehke daw booh tarik thymme.
Ha Mawkyrwat wa pynman ya ka yalehke ka Group H, ka yalehke hapyrdi ka Mawlarshong SC wa ka Rangdajied United FC da kut ko da 0-0.
Ha Williamnagar leh ym em wa thap kool hapyrdi ka Janepih YSCA wa ka Balmanduri FC. Ka Janepih toh kawa da jop la le sien ha ka Group H chwa ynne.
Ha Khliehriat won, ka Thangskai Tiger SC da yoo lakam wow rem ko pyrchah ya ka Jalaphet Moochut Pyrdung SC ha ka Group D hadien wa chah thap chwa ko tangwa da jop ko da 2-1. Ka kylla step da kut ko khlem em wa thap wei ha ka kylla miet da thap u Thomas Dkhar (53′) ya ka Jalaphet Pyrdung tangwa ka Thangskai da ye ko wow pynjop da ka kool na u Wendi Markson Nongtdu (72′) wa u Solmon Sympli (87′).
Ha ka Group C wa pynman ha Amlarem, ka Amalrem SC da jop ko da 3-1 ya ka Lamin XI SCC. U Iaid Da Kyrmen Jungai (4′) wa u Marshial Nongrum (27′, 83′) da thap ki ya ka Amlarem katwa ya ka Lamin da thap da u Densil Kongwang (78′).
Ka Shillong Lajong da jop ko da 5-0 ya ka Iatyllilang Lumsehkot CSC ha ka Group E wa pynman ha Wahiajer kiwa da thap da u Lalmuansanga (25′), u Colinsalmon Lyngdoh (56′), u Iohborlang L Lyngkhoi (70′), u Ricky Kharkongor (89′) wa u Wilbert D Marbaniang (90’+4).
Ha ka yalehke ha ka madan ka MFA ha Shillong, ka Nangkiew Irat da jop ko da 5-0 ya ka Mawlum Tyrsad SCC ha ka Group B wei ya kini ki kool da thap da u Neblejohn Lyngkhoi (7′), u Banshanlang Nongdhar (63′) wei da yoh Hat-Trick u Wallamsuk Nongkhlaw (75′, 85′, 90′) uwa da mih wow yalehke ha ka kylla miet.
Ha ka Group A, ka Khimusniang da jop ko ya ka Umkaber SCC da 9-0 ha SSA Stadium, Shillong. Ya ki kool da thap da u Primrose Lamat (3′, 45’+2) iwa mut kattu da yoh u wow thap la 9 sien, u Meroily Lytan (12′, 89′), u Dashngain Sukhlain (30′), u Dawanbiangmi Passah (36′) wa u Civility Khongmalai (69′) wei kawi won toh kawa da thap bakla da uwa yalehke ka Umkaber ha ka minit wa 16.
Ki yalehke mynstep kiwa daw sdang heipor 3PM:
Group A (Shillong SSA Stadium) – Mawshun SCC vs Nongkseh SSCC
Group B (Shillong MFA Ground) – Mulang SC Nongbah vs Mawphu SC
Group C (Amlarem) – Mawlai SC vs Laskein SCSC
Group D (Khliehriat) – Rymbai Shkenshynriah SC vs Ladthadlaboh SC
Group E (Wahiajer) – Lamyrsiang SCC vs Lumphyrnai Sohphoh FC
Group F (Mairang) – Umlakro SC vs Langsning FC
Group G (Williamnagar) – Maram FC vs A’chik SCO Rongjeng
Group H (Mawkyrwat) – Seng Samla Umdang Pyllun vs Mawten SC
Discussion about this post