U Montri ka chnat Revenue and Disaster Management ka jylla, u Lahkmen Rymbui da ong u wa ka jylla Meghalaya da man ko kawa da pynkhreh lada tynjooh ki bor ka bei ramaw deiwa phah ya ki bor District wow man kiwa syndong katkam wa mih i maham næ i khana chwa (Forecast) yei man i long i bneiñ.
Da ong u wa kiwa kreh hapoh i pait ki DC wa ki SDO ha waroh ka Meghalaya da man kiwa da pynkhreh wei emkaam u yaichah ki, deiwa pynrap wa da e bor ha jar hiar ki chnat wow leh ki yeiwa emkaam katkam i bor wa da pynkup ha ki.
Chooh chooh da ong u wa da e bor ha ki District Magistrate wow man kam ki Chairman ki Disaster Management wow pait ha jar jiar ki District katkam ki kyndon ka aiñ.
Heiyatoh wa ki bor kiwa kreh wa kamjooh ki tiar wa emkaam, neiliang u Lahkmen da ong u wa ka sorkar da man ko kawa da pynkhreh ym du hei bor ki bru tangwa wot ki tiar lada jia i tynjooh u slap ka la’ær deiwa phah nadooh kiwa kreh ka chnat Home Guard, ki pulit, ki bru na ka Fire & Emergency Service wa kiwi wei khamtam ki bru paidbah.
Heijooh i por da ong u wa i pynkhreh ka sorkar ymtoh du nei chah ktah na u slap ka la’ær tangwa wot i pait yei synjor ki loom, i chah ktah nei pam dieñ wa kiwi yeiwa ymye u khana chwa khamtam u khmi, wei i leh u bru pyrthai (kam i tyrrah kari, oor ki yung).
Kam wow pynkynmoo wa ka IMD da pynbna ko da ka Orange Alert neibynta ka East wa West Jaiñtia Hills hadooh ka 30 tarik uni u bnai.
Discussion about this post