U Wailadmiki Shylla uwa man leh kam u Montri ka chnat Sports & Youth Affairs da ong u wa ynne ka sngi da pynman ya ka yalang wa nyngkong ka National Games Secretariat Society kawa pynkhreh neibynta ka National Games kawa daw man ha Meghalaya ha u snem 2027.
Ha kani ka Society da pynpsiah chooh chooh ki dkhot na ka chnat Transport, Tourism, Health, IPR najrong kiwi khnang wow ya tiplang smat da waroh wei da rai leh wow yachem man-i-por yow man ka kaam kawa lai bait lai ryntih.
Da phah leh wow chna noh ki ya ki Committee yong kini ki chnat krehkaam waphær waphær khnang wow yoh u khut yalang yow sdang noh ya ka Review Meeting.
Da pyntip u wa katkam wa da pyrchang, 25 tylli ki yalehke daw pynman ha Shillong, 6 tylli ha Tura wa 3 tylli ha Jowai wei ka chnat da yaklam ko leh wa ki skur, ki College wa ki Hotel wow e thaw sah neibynta kiwa yalehke, ki Technical Staff, ki Coach wa ki Referee ha ka National Games.
Chooh chooh da khana wa da em leh kiwi ki jylla ka thaaiñ Northeast kiwa kwah wow embynta wow pynman ya ka National Games, kamtæ neiliang ka sorkar jylla da rai ko wow e cha ka jylla Manipur wow pynman ya ka Hockey.
Hawa yatoh wa i yarap poisa cha ki Association, u Wailadmiki da ong u wa ka sorkar dadep ko wow pynlait Rs. 39 klur wei na kani ka yarap poisa, ka Meghalaya da lai lehbha ko ha ka Khelo India Tribal Games heiwa da yoh ko hadooh 70 tam ki takma wei na ka kyrdan wa 29, kattæ da ku cha ka kyrdan wa 13 wei khlem da artatien ha u snem wow wan ka Meghalaya daw poi ko cha ka kyrdan wa san.
Discussion about this post