Neidaw wa joor i duna ki Doctor, kamtæ ka sorkar jylla da pyrkhat ko wow pynkylla ya ka Medical Bond Policy wow pyntikna wa ki Doctor u uiñ ki cha ka jylla wow chakri ya ki paidbah khamtam ha ki thaw palatsor.
Neiliang u Health Minister, u Wailadmiki Shylla da ong u wa ka sorkar dang pyrkhat ko wow pynkylla yeini hadien wa yoo wa boon ki khynnah MBBS wa phah puræ ka sorkar ym liwan de ki næ kyntait ki wow wan kreh katkam wa phah ka soskar hadien wa dep ki yei puræ.
Chooh chooh da ong u wa da puræ bniah lada emkaam wow pynkylla ya ka Bond Policy neibhah da sakhi wa boon ki khynnah ym liwan ki wow kreh manda dep puræ khamtam ha palatsor.
Da ong u leh wa ini i pynkylla u man i ha i dur wa ki khynnah hadien wa dep puræ MBBS ki daw hap kreh ki ha Meghalaya.
Heijooh i por da ong u wa ka Batch wa nyngkong yong ka MBBS ha Shillong Medical College u sdang ko ha uni u snem wei ini man i kam chibynta wow pynkhlan yei chakri ya ki paidbah ha i chait i khiah.
Discussion about this post