Ka NPYF 1-Nartiang Constituency da pynsñiaw ko yei wym sñiaw yahaap yei klam u President ka VPP ha ka 5 tarik uni u bnai ha Jowai, heiwa da pynbaad u wa wym em iyi iyi i roi i paar ha thaaiñ Jaintia Hills.
“I kwah i wow pynche wa ini i klam ym yahaap wei iwa sakhiat da mih madan khamtam ha ka 1-Nartiang Constituency heiwa ha kini ki snem wa da lai da sakhi ya kiwa boon ki kaam pynroi kiwa da mankaam nadooh ki luti ki syngkieñ waphær waphær, ka puræ puthi, hadooh ki sarok wa pynyabi kiwa da pynsuk yei lai i wan wa i yatoh hapyrdi ki chnong. Kini waroh da wanrah ki yei kylla wa bha ha ka imlang sahlang wa hei im ki paidbah.”
“Kawa rap kongsan wa sñiawkmen i wow yoo yei pyrkhat wa joor neibynta ki khynroo khyllood. Ki Scheme pynpliah, ki laad yoh kaam wei i kyrchaan ya ki kaam seiñ khih kiwa da wai ki laad ki luti ya ki khynroo khyllood wow yieñ ki ha ki kjat yong ki hi wei man ko ka bynta wa kongsan wow pynku ya ka mynried ka Constituency.”
“Heijooh i por, hei lai luti ini i roi i paar, i yahkhmat u MLA ka 1–Nartiang Constituency uwa man leh u Symbood Montri Rangbah ka jylla Meghalaya, u Sniawbhalang Dhar toh deiwa embyntalang u chiboon. Kamtæ i beiñ joor i yei pynbaad wa mih pyrchah ya oo, wei i kdaw che i wa kitai ki pynbaad toh kiwa man thok wei kiwa khlem yurim. I sñiaw i leh wa kam kini ki pynbaad ym du wa ktah ki ya oo samen, man ko leh kam wow kdaw kti leh pyrchah ya ki khynroo wa ki paidbah ka 1-Nartiang Constituency hi waroh kawi.”
“Ka NPYF 1-Nartiang Constituency yieñ skem ko ha ka yurim wa lada dang emkaam wow pynbha chooh chooh ha ki kattu katni ki bynta tangwa ymtoh wow kyntait næ pyndooh yei roi i paar wa dadep mankaam. I u pteiñ i wow kyrchaan ya kiwon ki laad ki luti kiwa wanrah yei roi i paar, i yatylli wa i bha i miat neibynta waroh.
“Hawa kut, hawa chimkhia yei klam u President ka VPP uwa da ong wa u Sniawbhalang Dhar toh u lai ‘Tuition’ yow sñiawthooh ya ka saaiñ pyrthai, ka NPYF 1-Nartiang Constituency ka kwah ko wow pynsñiaw deiwa che boi toh oo hi uwa emkaam wow lai Tuition ha u Sniawbhalang Dhar, khnang wow sñiawthooh kammon wow wanrah ya ka roi ka paar kawa skhiat wei leh kammon wow jop ha ka yakhun Election deiwa chakri wa hok ya ki paidbah.”
“I kyntu i ya waroh kiwa embynta wow chimbynta hei yaklam wa tei, kawa man sakhiat wei kawa em yei kitkhliehlang, neibynta i roi i paar wa neh wei kawa pteiñ ha Jaiñtia Hills,” pynkut ka kyrwoh na ka NPYF 1–Nartiang Constituency.
Discussion about this post