U Montri Rangbah ka jylla Meghalaya, u Conrad K Sangma, ha ka 11 tarik uni u bnai da wai paidbah u ya ka karkhana pynmih Biochar kawa nyngkong dooh yong ka jylla kawa pynkreh da ka chnong ha Umsli, Ri-Bhoi District, kawa man ka laad kawa kongsan wow yaleh pyrchah yei kylla ka suiñbneiñ wei wow wanrah ya ka kamai kajih ha palatsor wa ka rep ka riang kawa neh.
Deiwa em kani ka karkhana, u Conrad da ong u wa daw pynkylla ya u siej uwa dadep ah yow pynman oo kam u rngaw hadien wa thang ya ki mar rep kam ki chken ki siej, ki mar rep kiwa da sih, ki snieh dieñ deilang kiwi de ki mar thung kiwa da ieh deiwa thap ki ha ka thaw wa duna Oxygen lyngba ka rukom wa tip kam ka Pyrolysis.
Da ong u wa ym du wow pynemkaam kam u rngaw yow chet u tu, u Biochar toh uwa ye wow pynemkaam yow pynsboh yei khyndaw wei uwa ye leh wow kjit ya ka Carbon. Uni u mar uwa em pahooh ka Carbon ye u wow pynku yei pynmih mar rep wei wow kset ya ka Carbon u mih ko da ki spah snem.
Neiliang ki heh sorkar da ong ki wa kani ka Umsli Unit em ko ka bor wow pyndooh noh kamwa 6,000 MT ka Carbon Dioxide ha ki 20 snem wow wan najrong wa pynmih ko leh ya ki laad kamai kiwa boon neibynta ki paidbah wa sah cha palatsor.
Discussion about this post