Ynne ka sngi u General Secretary ka Hills Farmers Union, u Allfondbirth Kharsyntiew da lai synraan u ya ki paidbah Lapangap wow lai hiar rep ki deiwa ong wa da lai chwa ki ha ktem ki pulit ka Assam kam ka dak wow em i krehlang.
Da ong u wa man iwa sñiawsih wa ki paidbah ym yoh ki wow yooh kjat ha ki hali yong ki, deiwa ong wa burom ka seiñ ya ka yalang Peace Meeting wa man ha Khanduli ha ka 5 tarik uni u bnai May heiwa u Secretary ka Tahpat da ong u wa ym em i wit hawa wan rep ki Lapangap tangwa kwah donhi ki wow khana pyrtuid yong ki bru wa suba tynyap ya u Oriwel Timung na katai ka chnong yong ki, yeiwa da leh katkam wa kwah ki lyngba ki bor u SP ka West Jaiñtia Hills.
U Allfondbirth da ong u wa da yaichah ki ar sngi hadien itæ, wei da rah pa rah sngi neibhah wa kwah ki Karbi wow pynsñiaw yeiwa yaklam ha ka yalang cha ki paidbah ka Tahpat.
Da khana u leh wa da rah ma rah sngi ya i thmu yakhih ha Shillong wei ha ka 13 tarik da yoh i kular na u Deputy Chief Minister wow pynbiang ya ki bor yada tangwa hadooh ynne da man itæ i kular wa sepai.
Chooh chooh da ong u wa ynne da yachem u wa u heh ka jaitbru Karbi heiwa i rukom yaklam ki Karbi kylla i man ka kynta neibhah da kylla ya ki mat (Agenda) man la i por.
Da maham joor u ya ka sorkar wow chimkhia sakhiat ko ya ini i kaam khnang wow lait na iwon iwon i jia wa heh heiwa daw hap lai ki wot cha ki bor cha Delhi.
Discussion about this post