Ka sorkar jylla da klam che ko wym e laad yei thmu wow ngooid ya ki thaw rep yong kiwa chong chnong ka Lapangap, neibhah ini ymtoh nei kajia pood tangwa toh du hajrong ka rep ka riang wei da pynsñiaw u leh wow pynbor bait ya ka sorkar Assam wa toh u burom ko yeiwa da jooh leh da ki pahaw snem kattu.
Neiliang u Symbood Montri Rangbah ka jylla uwa pait leh ya ka Kaam Pohyung, u Prestone Tynsong da ong u wa ka sorkar daw pyntikna ko wa ki paidbah ka Lapangap kiwa da rep ha katai ka thaaiñ kattæ da ki phaw snem u yoh ki u rep bait kamwa jooh man.
Da ong u wa katkam ki kot ki sla wa da yoh ha u snem 2023 wei hadien wa da yachong ki bor pynlai ka District yong ka West Karbi Anglong wa ka West Jaiñtia Hills, da rai wow pynneh ya ka Status Quo iwa mut wow lai kamwa jooh man neibhah wa da chem wa kitu ki thaw rep ki Lapangap toh kiwa da mantre ki nadooh ki por yongrim.
Da khana u wa ha u snem 2025 leh da em biang ka jooh ka ya mynjur wow chah ya ki paidbah wow rep u riang, tangwa em ki bru ki wym kwah yei chong suk kiwa em deiwi won i thmu, kiwa kwah wow thung da kiwi ki jait ha ki thaw wa rep kiwa chong chnong ka Lapangap kattu la 50-60 snem.
U Prestone da ong u wa neiliang ka sorkar ym e laad ko yeini wei u Montri Rangbah ka Meghalaya wa u Montri Rangbah ka Assam wa ki bor District leh da phah ki wow pyntikna wym em iwon iwon i khang ya kiwa rep wei yow rep ki kamwa jooh man hi.
Hawa kylli, u Prestone da ong u wa i phah sangeh chwa yei lait rep ymtoh iwa daw neh slem, heiwa da kyrpaad leh ya kiwa chong chnong ka Lapangap wow man ki kiwa jai-jai deiwa ong wa neiliang ka sorkar e ko yei kyrchaan wa pura ya kiwa chong chnong ka Lapangap.
Discussion about this post