Ka chnong Samanong kawa haap hapoh ka Amlarem C&RD Block, West Jaiñtia Hills District lyngba ka Community-Led Agritourism Initiative, ha ka 16 tarik uni u bnai da sdang ko yei lai luti wa thymme yow pynku yei yoh i laa wa neh hapoh ka chnong ka thaw itæ toh lyngba ki kaam uiñke suwari, ki riti dustur wa i kaam rep kaam riang.
Yeini i lai luti thymme ka chnong Samanong da yarap e mynsien dei yoo jngai ka Regeneration Meghalaya Project, ha ka thong u pynyoosuk ya ka rymaw soodong sookun, u pynkhai im biang ya ki khyndaw, ki riti dustur wei wow thooh leh ki laad ki luti kammon yow im u kamai ki paidbah wa chong chnong.
Ha katai ka sngi kiwa chimbynta ha i lai kjat wa kamwa 6.5 Km yow lai lyngba ki loom, ki madan phlang wa ki khloo, da yoh ki wow ngam yillu wa ka rymaw wei da yoh yei sñiaw pyngngaad ha i pynlut por wa 3 kynta chiteiñ.
Ka Patricia Mukhim kam kawi na kiwa thoh wa bna naam heiyatoh waka imlang sahlang kawa da embyntalang ha ini i lai kjat, ong ko wa hanla man i lai luti wa jngai, tangwa phylla ko wym em sñiaw yei ngiah tangwa sñiaw chait sñiaw khiah pathan.
Da yaroh ko leh yei lai luti kiwa chong chnong neibynta u pynneh pynsah ya ki khloo chnong wei yoh ko u yoo yei rben ki dieñ ki phlang.
Neitæ iwa pynsah kynmoo ya kiwa lai kjat toh i poi ki ha uwi u loom wa yoh ki u yoo yei bynta wa chapoh ka wah Umngot, kawa pynyakhlaad hapyrdi ka East Khasi Hills waka West Jaiñtia Hills.
Hawa yieñ ki najrong uni u loom sñiaw ki yei pyngngaad kamjooh i wan u lyoh ka la’æer wa napoh chajrong loom iwa pyndait-thah wei pynpyngngaad.
Neiliang u Bah Deng kam uwa embynta ha kani ka sngi ong u kani da man i lai uiñke wa kyrpang, heiwa da man kam i yachem wa ki loom ki wah, i sñiaw jan kamwa da yoh u tba ya ki.
Da ong haroh u wa ini i lai uiñke lyngba ka Samanong ym em man du kat i lai pyndep donhi, tangwa yoh ki leh yei tip i chemphang, najrong wa yoh ki u sakhi ya ka riti dustur, lyngba i lai luti ki na ki thaw rep, ki thaw ri ngap, wei yoh ki leh u yoo dei khmat yei rukom im rukom rep ki bru kani ka chnong.
Yei lai kjat ha kani ka sngi da pynkut ki deiwa lai pait ya ka krem (Sandstone Cave) wei ha kani ka krem em leh ka um kawa pyndap umdih ya kiwa chong chnong.
Neiliang kiwa chimbynta hei lai kjat pynsñiaw ki leh i kmen i yaroh yei rukom pdiang kiwa chong chnong nadooh i pynbiang baam ki ya ki da ki jait baam tynre wa yoh na kani hi ka chnong kam u salah, chru, pylleiñ, tpu seiñ, umngap, i jadoh jalieh, ka dakha na wah Umngot najrong kiwi ki dohum, doh siyar, ki jhoor wa boonjait wa kiwi.
Neiliang kiwa chong chnong ka Samanong da khut sñiawbha ki ya kiwa uiñke suwari kamjooh kiwa maya rymaw wow wan sakhi wei wow kyrchaan ki ya ka thong yong ka chnong.
Wei neibynta u tip bniah, da kyntu ya ki paidbah u Phone ki ha ka Samanong Agritourism Community Initiative lyngba kini ki number 7628946254 wa 9863495585.
Discussion about this post