Uwa seiñ khih yong idæ, u Samborlang Diengdoh da pynbaad u wa ka sorkar jylla ym em pynkrehkaam ko ya ka hukum ka Meghalaya High Court kawa da pynksan leh da ka Supreme Court yong ka ri, heiyatoh wa i yoh nong kiwa khayi kiad pharæng ha ka jylla, heiwa na kani da e 4.5% cha ka The C-Tel Infosystem Private Limited wa mihkhmat da ka MP Singhania & Company na Jail Road Shillong.
Katkam i khana u Samborlang, i wanrah ka sorkar ya ka Integrated Excise Management System yow e cha ka The C-Tel Infosystem Private Limited, da khatæ ya ka bai yoh nong kiwa khayi na ka 20% cha ka 15% neibhah wa 5% da hap e noh cha ka Company ki Singhania.
Da ong u wa hajrong itai i leh yong ka sorkar, neiliang ka East Khasi Hills Wine Dealers Welfare Association da ujor ko cha ka High Court, heiwa ka High Court da pynksan ko ya ka Association wei da phah ya ka sorkar wa toh u e bait ya ka 20% ka bai yoh nong cha kiwa khayi, tangwa ka sorkar ym em leh ko kamwa da phah ka yung bichaar, heiwa da pyntam du .5%, iwa mut wa kiwa khayi da yoh nong ki du 15.5% wei 4.5% won da yoh da ka Company ki Singhania.
Hawa pynsñiaw hajrong ini, da ong wa na ka kiad wa umphñiang wa su kiwa khayi cha ka jylla man ko kawa heh, kamtæ u Samborlang da ong u wa lada ya ka bhah wa ki toh u yoh nong ki da chah knieh noh ha ka sorkar, daw wanrah yei eh ya kiwi ki khynroo wa khih dei kaam yong ki hi.
U Samborlang da khyrwait u deiwa eh leh ya u Montri Rangbah wa noh chiliang u du cha ki kattu katni ngut ki Businessmen khlem da pyrkhat ya kiwa boon walang.
Da pyntip u leh wa hawa booddien ya kani ka kaam, da chem wa uwa pynlai ya kani ka kaam waroh toh uwa tip pyrtuid kam u Vikram Singhania wei ka sorkar kwah ko wow pynhun ya utæ uwa samen.
Discussion about this post