Ha ka 31-05-26, ki ar ngut ki khyllood kiwa na chnong Barato, West Jaiñtia Hills da paan yarap ki na ka Khasi Students’ Union Delhi Unit hadien wa poi ki cha Delhi deiwa yoh kular wow yoh kreh hapoh kawi ka Hotel tangwa da chah pynbor ki wow leh ki kaam dakait deiwa dai yei doh i pran yong ki.
Katkam wa khana kini ki kynthai, hadien wym bien ki wow leh yeini, ka bru kawa wan yah ki cha Delhi da dawa ko wow su ki ka bai lutsan yei lai i wan ki wei da knieh ko leh ya ki mobile phone.
Kini ki kynthai da ong ki kani ka bru ym chah ko wow mih ki kat wym pu em su ki ya ka bai lai bai wan ki iwa dadep ko wow pynlut.
Hadien wa tip ka KSU Delhi Unit, da pyntip ki wut-wut cha ki Delhi Police kiwa da lai cha i thaw wa chah ksoh kini ki kynthai wei da kem ki ya ka bru kawa ksoh ki yow kylli takit ka.
Kani ka bru da kyntait ko ya waroh iwa da chah pynbaad ko deiwa ong wa kini ki kynthai pna wan hi ki cha Delhi yow thooh kreh wei ka da su ko ya ka bai lai bai wan ki yow yarap pynyoh kreh ki. Da kyntait ko leh wa pynbor ya kini ki kynthai wow dai ki yei doh i pran ki.
Hadien wa tuklar ki pulit, kani ka bru da pynuiñ ko ya ki mobile phone kini ki kynthai wei da lai noh ki wa ka KSU Delhi Unit.
Katkam wa man kattæ, kini ki kynthai dang em ki hei yada ka KSU Delhi Unit wei dang ya pynbait yow phah liwan ki deiwa suk wa saaiñ heiwa kawi na kini ki kynthai dadep phah poisa kiwa ha-yung ha-sem ko yow thied Ticket lieñsuiñ wei daw liwan ko mynstep ka sngi cha Meghalaya.
Neiliang ka KSU Delhi Unit da kyntu ko ya kiwa wan thooh kreh wow man ki kiwa syndong hawa em kiwa tyrwa kreh wei wow pyntikna chwa wow lai ki chei thaw wa e kreh.
Discussion about this post