Ki bru ka State Disaster Response Force (SDRF), ynnin ka sngi da ye ki wow sai yei metyap yong u bru uwa 41 snem i rta napoh kawi ka krem mooyong kawa da ieh khlem pynemkaam kawa em hajan ka yung krehkaam warim u DC ha Khliehriat, East Jaiñtia Hills District wei yeini da ye wow leh hadien wa da pyrchang la 6 sngi.
Ki bru ka 1st SDRF Battalion kiwa na Shillong da khut ya ki ha ka 27-05-26 hadien wa em uwi u bru uwa 41 snem i rta uwa da toh haap chapoh kani ka krem mooyong ha ka 26-05-26 heipor wa dang mut u wow lai tong um najan Khliehriat wei kani ka krem wa haap u toh kawa yillu kamwa 120ft.
Hawa poi nyngkong ki bru ka 1st Battalion, State Disaster Response Force (SDRF), da lai pait ki yow tip kammon u leh yow sai yei metyap tangwa neidaw wa da sdang doom ym ye de wow leh iyi iyi ha katai ka sngi.
Sa iwi wa chem chitom toh wa ka um wa em hapoh kani ka krem toh kawa yillu 40 ft iwa pynman wow chem ya uwa yap iwa eh bha wei da wan wow yarap da kiwa chong chnong deilang kiwa ha-yung uwa yap kiwa da pynemkaam da ki Pump yow taan yow pynduna ya ka um.
Kamtæ hadien 6 sngi i pyrchang deiwa ya krehlang nadooh ki bor chnong, ki bor District, kiwa chong chnong wa ki bru ka SDRF, ha ka 1 tarik uni u bnai heipor kamwa 6:30 i janmiet, ki soo ngut ki dkhot ka SDRF deilang wa ar ngut kiwa chong chnong da hiar ki chapoh kani ka krem yow thooh yei metyap wei manda kieh 9:00 waje i miet da chem ki wei da ye leh wow sai wei da e kti cha ki pulit.
Neiliang ka SDRF da phah ko yei kyntien sñiawlem cha ka yung ka sem uwa khlaad deiwa e khublei le ya waroh kiwa da e yarap.
Discussion about this post