Ka Lion Sports & Youth Affairs (LSAYA) yong ka Dorbar Chnong Lion Mission Compound Jowai, ynne ka sngi da yoh ko ya ka Badminton Mat kawa da angnood ko da slem deiwa kyrchaanlang u Wailadmiki Shylla, MLA ka thaaiñ uwa man leh u Montri yong ka chnat Sports and Youth Affairs ka sorkar jylla.
Ya kani ka Badminton Mat kawa chong dor Rs. 2 lak 88 hajar, neiliang u MLA da yarap u Rs. 2 lak, katwa ka Rs. 88,000 da pyndap da ka Lion Sports and Youth Affairs.
Haka yalang wai ya ka Badminton Court Mat wa da pynman ha Auditorium Hall ka Dorbar Chnong Lion Mission Compound hei pynlai u Wijan M Pohleng, Chairman LSAYA da emlang u Wailadmiki Shylla kam u kongsan, ki waheh wasian ka dorbar chnong wa kiwa chah khut sñiawbha.
Neiliang u Wailadmiki Shylla hawa klam ha kani ka sngi ong u, “Kam kiwa e, sñiawkmen ki wow yoo hawa pynemkaam hok ya iwon iwon wa da e, najrong wow thooh laad chooh chooh kammon u man i kyrkhu ya ki khon ka chnong”.
Hawa yaroh wei e khublei ya ka Lion Sports & Youths Affair heiyatoh wa kani ka Badminton Mat wa da yoh u wai ha kani ka sngi, ngait skem u wom man ko i kyrkhu ya ki khon khynroo khyllood khamtam kitu kiwa em i sap i sñiaw ka-it ha kani ka jait yalehke, neibhah chibynta yarap ko leh u pynyoh ya ka spah yong i chait i khiah hei im i.
Heijooh i por yooluti u wa na kani ka chnong u mih kiwa yalehke ki wow rah naam ya ka District waka jylla.
Discussion about this post