Ka dorbar yong Ka Dorbar Ki Waheh Kur Ri Jaiñtia kawa da man ynne ka sngi ha Yungwalieh ka Dorbar Chnong Chilliangraij Jowai, da wan chimbynta da ki President, Secretary wa kiwa mihkhmat yong ki kur waphær waphær neibynta u yaklam hajrong kiwa boon ki phang.
Ha kani ka dorbar da yaklam haroh hajrong ka chithi wa dadep e ini wa dep cha u CEM ka JHADC u Thombor Shiwat heiwa da e por ki ya oo wow jubab lyngba i thoh næ deiwa khut yaklam hapoh ka 10 tarik uni u bnai June neibynta u chna aiñ næ wow tipmit noh da ka aiñ ya ki kur wa chim jait naka bei, kamjooh leh yow tipmit ya ki seiñkur wa ki waheh kur.
U President Ka Dorbar Ki Waheh Kur Ri Jaiñtia, u Khroo L Pariat ong u, yei thoh da e nadooh 2 snem nachwa najrong i yaklam i lai yachem tangwa ym bna ki.
Neiliang kiwa yahkhmat ong ki diaw bha ki neibhah wa heiyatoh wa kani em ka aiñ wow bood ryntih næ u tipmit ya ki kur katkam ka Sixth Schedule.
Lyngba kani ka dorbar da chim rai ki wow e por biang ya ka JHADC sa 15 sngi ite nadooh ka 15 tarik uni u bnai June hadooh 30 tarik, khnang wa u CEM deilang ka EC yong oo u chimkhia wanrah noh ko ka aiñ wow tipmit ya ka kur wa e jait cha ka bei deilang ki seiñkur, ki waheh kur wa em hapoh u pood ka District Council.
Da ong leh wa hadien wa dep pynskem chwa ya ki kur wa e jait cha ka bei, kyntu ki wow tipmit won sa ya kiwi ki jaitbru.
Wei lada hapoh kini ki 15 sngi ym leh ki iyi iyi, pyntip ki wa ye ki u mih madan hajrong kani ka mat dawa.
Discussion about this post