Ka Congenital Heart Disease Screening Camp kawa ar sngi da pynkut ka ha ka 24 tarik uni u bnai ha Loomkhliehriat, Panaliar Jowai, heiwa da em 186 ngut kiwa da wan wei da yoh ki leh yei pait i sylli na ki Doctor.
Ya kani ka Camp da pynman da ka District Early Intervention Center (DEIC), Jowai deiwa ya krehlang wa ka Amrita Institute of Medical Science, Kochi neibynta kiwa na East wa West Jaiñtia Hills District.
Ki Doctor wa da wan toh u Dr. Mahesh wa u Dr. Amit deilang u Specialist, u Dr. M. Swet na MCH.
Na ki 186 ngut kiwa da pait da sylli, 43 ngut da jied yow chah pooid katwa 62 ngut da phah wow wan biang ki hadien 6 bnai hadooh chi snem yow pait biang yei long i man ki.
U Dr. Mahesh K, Professor of Pediatric Cardiology ka Amrita Hospital, Kochi hawa e yei klam da ban joor u yei emkaam wow chem smat yei kjut klong snaam iwa jooh jia bha nadooh wa kha ya ki khonboo wei deiwa chem smat ye wow sumaar deiwa pooid yow lait u chitom hadien habood.
Kini ki Doctor da lai ki leh cha ka Maternal and Child Health (MCH) Hospital heiwa da pait ki leh ya kitu kiwa dang kha wa ki khynnah kiwa em hapoh ka Special Newborn Care Unit (SNCU), Pediatric Intensive Care Unit (PICU) wa ka Intensive Care Unit (ICU).
Katkam wa pyntip ka DEIC, i thooh ya kiwa chitom klong snaam toh iwa da leh nadooh ha ki Block wei ki khynnah wa suba wa chitom da pait da ki bru ka Rashtriya Bal Swasthya Karyakram (RBSK), ki bru ka Mobile Health Teams (MHT) deilang ki Doctor wa em ha ki Primary Health Centers (PHC) wa ki Community Health Centers (CHC).
Hadien ini da lai yah ki cha ka District Early Intervention Center yow pait ki Doctor yei long i man ki da ki Doctor Pediatrician wa ki Medical Officer ka DEIC.
Da lai yah ki leh wow leh ya ka Echocardiogram kam cha NEIGRIHMS wa cha kiwi ki Hospital ki bru samen wa em ha Shillong.
Manda pyntikna yei chitom da chim yei pyrtuid ki yow pait u sylli da ki Specialist Team na Kochi wei kiwa chah jied u yoh ki yei sumaar deiwa pooid khlem da hap su poisa hapoh ka RBSK Program.
Da pyntip leh wa lada em kiwa suba chitom klong snaam næ wa em i chitom nadooh wa kha ye ki wow wan cha ka District Early Intervention Center (DEIC) wa em ha Panaliar.
Da pyntip leh wa na ki 43 ngut kiwa da chah jied ha kini ki ar sngi, daw lai chah pooid ki cha Kochi heiwa wot ka bai lai wa ka bai sumaar man ko dei mynkna.
Discussion about this post