Kam chibynta i pteiñ yei leh pyrchah ya kiwa khayi tooh ya ki mar wa ye u wanrah yei mynsoo (Hazardous Contraband), neiliang ka Directorate of Revenue Intelligence (DRI) da ye ko wow kem ar sien yei thmu wow wanrah ya ki bomkala na China cha India lyngba ka Chennai Port.
Ki bru ka DRI da yoh ki wow ksoh ya ar tylli ki 40-ft Container kiwa wan na China heiwa ha ki kot ki sla da ong wa hapoh ki Container toh ki “Trolley Bags” wa ki “Sprayers”. Hawa wai ya kini ki Container da chem hapoh 46,000 tylli ki bomkala wa boon jait kiwa da murieh deiwa tymmoh dei miat.
Ha iwi won, ki DRI wa ki Chennai Customs da chem ki yei rukom khayi tooh ya 18.7 MT ki bomkala wa wanrah na China deiwa yoh kiwa khayi wow sai ki napoh ka Container Freight Station (CFS) khlem da yohbor na ki Customs heiwa da thap won da kiwi ki mar hapoh ka Container manda wanrah biang ka. Yeini da ye u leh deiwa emktilang kiwa kreh ka CFS. Heiyatoh wa ini da yoh wow kem ya ar ngut.
Kini ki jait bomkala toh kiwa da khang wow wanrah katkam wa kheiñ da ka ITC (HS) Classification of the Foreign Trade Policy wei da emkaam ki leh ya ka Licence na ka Directorate General of Foreign Trade (DGFT) wa na ka Petroleum and Explosives Safety Organization (PESO) katkam ka Explosives Rules, 2008.
Chwa ini ha u Naisan, ka DRI da pynman ko yei lai kynreh ha Mumbai heiwa da yoh kem palat 100 MT ki bomkala wa da wanrah na China. Ha ini leh da yohlaad wow wanrah ya kini ki bomkala toh deiwa emkti kiwa kreh ka CFS kiwa da sai yei mar dep tæ thap ki da kiwi won hapoh ka Container. Da kem ya 10 ngut ki bru wa kyntup ya 4 ngut kiwa kiwa kreh ha ka CFS heiwa uwi na ki toh u Exports Manager.
Waroh kini ki bomkala China kiwa da chah kem toh kiwa chongdor kamwa Rs. 35 klur wei kiwa chah kem da em ki 12 ngut.
Discussion about this post