Ka Meghalaya Cricket Association (MCA) da Suspend ko ya u Secretary yong ka, u Rayonald Kharkamni wei da khang (Banned) ko waroh chirta ya u Head Coach ka Under-23 Women’s Team kamjooh ya u Team Manager hadien wa pynmih ar tylli ki hukum da ka Meghalaya State Commission for Women (MSCW) kawa da chem yei em i chah leh khlem akor ki kynthai nadooh u snem 2025 tangwa da murieh yeini.
U President ka MCA, u James P.K. Sangma hawa yaklam wa kiwa thoh khubor da ong u wa ya u Secretary, u Rayonald Kharkamni da Suspend oo chisiendon katwa ka kaam dang lai ko chakhmat wow takit katwa ya u Head Coach u Hemant Roy wa u Team Manager, u Sanjay Mandol da pyndam noh ki chisiendon hadien wa ka MSCW da pynmih hukum ko ha ka 5 tarik uni u bnai deiwa kdaw ya ka aiñ Sexual Harassment of Women at Workplace (Prevention, Prohibition and Redressal) Act, 2013 kawa tip leh kam ka POSH Act, 2013.
U James da ong u wym e laad wow jia kam kini ki kaam wei daw phah leh ya ka Report cha ka Board of Control for Cricket in India (BCCI).
Ha ka hukum wa ar wa pynmih ka MSCW ha ka 26 tarik uni u bnai da chem wa em soo ngut ki dkhot kiwa man kam ki MCA Officials, deilang u Kharkamni ki way em leh iyi iyi hadien wa booh ki kynthai wa yalehke Cricket ka Meghalaya ya ka ujor heiwa da phah da ka email ha ka 2 wa 3 tarik u December, 2025, wei ym em leh thung ki da ka Internal Complaints Committee katkam ki kyndon ka aiñ.
Kiwa da pynmih pyrtuid ha ka hukum ka MSCW ki wym em leh iyi iyi katkam ka aiñ POSH Act, 2013 toh u Nababrata Bhattacharjee, President warim; u Rayonald Kharkamni uwa man kam u Secretary wa kattæ; u Shining Star Lyngdoh, Operations Manager wa u Dhrubajyoti Thakuria uwa man kam u Treasurer warim.
Deiwa dam u thung ya ka Internal Complaints Committee, kini ki kynthai ym yoh laad ki wow pynsñiaw yeiwa jia ya ki.
Ka MSCW kawa khlieh da ka Iamon Syiem, da phah ko ya u President ka MCA wa kattæ deilang u Ombudsman ka Association wow leh ki yeiwa emkaam wei wow booh ka Report hapoh 30 sngi.
U James da ong u wa da phah ya ka Show Cause Notice cha waroh ki soo ngut kiwa da mih pyrtuid wei da e por wow jubab ki hapoh ka 30 tarik uni u bnai wei yei jubab daw booh hakhmat u Ombudsman — u Justice (Retd.) B.D. Agarwal, uwa jooh man kam u Judge ka Gauhati High Court wei ya kini ki soo ngut da Suspend ki deiwa yang kammon ka rai u Ombudsman.
Heiyatoh wa i mih khubor wa u Kharkamni em u i thmu u wow yakhun yeini ha ka High Court, u James da ong u wa chong ha oo tangwa ka MCA ym su ko ya ka bait yaleh mukotduma u.
U James da khana u leh wa em kawi ka Meeting ha ka 9 tarik u May wa khut pynman da u Kharkmani khlem da tip ki heh ka MCA wei kani da leh khlem da yoh bor kam wow pyrchah ya ka hukum u President wa pynmih ya ka Order yow Suspend ha ka 7 tarik.
Ha kani ka Meeting u Kharkamni da wanrah u ya ka phang wow pynsangeh chwa ya iwon iwon i thmu wow thung ya ki Ombudsman wei ya ka Meeting da pynman bait ka hanla da em ka hukum wa da pynmih u James kam u President.
Ha ka chithi beh kreh ya u Sanjay Mandal, uwa man kam u Manager ka Meghalaya Cricket Association Under-23 Women’s Cricket Team da ong wa heipor wa em kawi ka Tournament ha Agartala, da phah u ya kawi ka kynthai (Player) wow wan cha ka kamra u hapoh Hotel heiwa da tyrwa kiad u ka, da taan u ka cha ka palong, da taan u leh ki sula ko. Hadien ini da leh Video Call wa ki Voice Call cha ka ha WhatsApp yow kyrpaad ya ka wow phah ko da kawi won ka kynthai (Player) cha kamra u.
Ha ka chithi beh kreh won ya u Hemant Roy, Head Coach, Meghalaya Cricket Association Under-23 Women’s Cricket Team da ong wa da klam u da ki ktien wa jakhlia, da dai sarom, ym chah u ya kiwa kreh (Staff Member) kiwa man kam ki kynthai wow embynta ki ha ki Team Meeting, da pynyoo u yei chrai ya kiwa yalehke wa em hapoh yong oo wei yeini da jia heipor wa ka Meghalaya lai yaleh Cricket ko ha Agartala.
Da ong leh wa ka MSCW da chem ko wa uwa chipayu wa u Hemant uwa man kam u Slector ka MCA da maham u ya kitu kiwa booh ya ka ujor wym chah jied de ki wow yalehke.
Discussion about this post