Ynne ka sngi Pynsiñ ka 6 tarik u Naiynñiaw, ka Behdieñkhlam ka Raij Jowai kawa man tip leh kam ka Soo Sngi Le Yaaw da man ko kawa da sdang heiwa ki khon ka Raij ha jar jiar ki Yung Blai wa ki Kmaiyung heipor chiteiñ sngi da pynkhreh ki wow pyndep ya ka Siang ka Pha næ ka E Chyllap Chylliang.
Ka Siang ka Pha mut ko wow e baam e dih ya ki Sangia Saret kamjooh ya u Trekirot katkam i sikai ka Niamtre heiwa da sakhi wa waroh ki Yungblai wa ki Kmaiyung da pyndep ki yeini.
Hadien wa dep ka Siang ka Pha, ki Khon Raij da pynlang paaid ki ha Khliehchnong yow pynkhreh wow lai thooh ya ka Symbood Khnong na Riatturiem wei wow booh won ya ka ha Loom Sooyung.
Chirup wa i ood ka bom, ka bhuri, ka bikur wa ki chæng-chæng ki paaid kiwa kynthup ya ki khynnah wa ki waheh dei chaad dei kyriaw ha tymbud u sarok da mih ki wow lai cha Riatturiem.
Hadien wa kit wa bah ya ka Symbood Khnong da pynchongpynthiah ya ka ha Loom Sooyung ha Jowai Shillong Indica Stand.
Ynne hanla em u slap wa joor, ka sngi Pynsiñ ka Behdieñkhlam da man ko kawa chongkun bha.
Hawa yaklam wa u Dolloi ka Elaka Jowai uwa man leh u khlieh ka niam, u Puramon Kynjing da ong u wa ynne ka sngi da sdang ya ka lehniam Behdieñkhlam heiwa da e u i kitbok kitrwiang leh ya warohlang.
Discussion about this post