Ya ka World Zoonoses Day 2026 da pynman kyrpang kam ka laad yow wanrah ya ka yutip hapyrdi ki paidbah ya ki kattu katni ki kjut kiwa yabi na ki mrad nadooh ki sniang, masi wa kiwi kamjooh leh na ki ksaw cha ki bru.
Man ko leh kam ka laad wow pynyatyllilang ya ki bru, ki seiñ waphær waphær, ka sorkar wa kiwi kiwi kiwa chimbynta yow ya krehlang ki pyrchah ya kani ka kjut neibynta i bha i miat ka imlang sahlang wei i thmu (Objectives) wa kynmoo warom ia ynne ka sngi toh wow:
1. I e hikai ya kiwa chong chnong ya ki laad wow lait na ki kjut wa yabi na ki mrad cha ki bru kam ka kjut Rabies, Japanese Encephalitis wa kiwi de.
2. I kyntu wow pynmyllien man-ka-sngi wow phikir bha deiwa sait khooid ya ki kti ki kjat hadien wa wan i na ki trep, u chet bha yei doh wei wow pynbiang i ya ki dawai tika ya ki mrad wa ri i kamjooh leh ya ki ksaw.
3. I kyntu yei ya krehlang næ tyllilang i nadoooh ki Doctor Medical, Doctor Veterinary wa kiwa chong chnong hi waroh neibynta wow yada næ pyndooh jait ya kini ki kjut.
Kam wa kynmoo warom ya u moomær yong kani ka sngi, ha uni u snem ka phang yong ka World Rabies Day 2026, toh kamni: “Working Together: Preventing Zoonoses Through Community Action”. Iwa mut wa i yakrehlang chirup wow yada wei wow lait na ki kjut wa yabi na ki mrad wa ri cha ki bru deiwa chimbynta kiwa chong chnong ha man-ki-chnong.
Ya kani ka sngi World Zoonoses Day da pynman ya ka man-u-snem ha ka 6 tarik u July wei da jied ya kani ka sngi kam ka dak wow kynmoo warom ya ka sngi yap u Louis Pasteur – uwa man kam uwa chem nyngkong ya ka dawai tika pyrchah ya ka kjut Rabies.
Ka Meghalaya Veterinary Services Association, Jaiñtia Hills District Unit, da jooh pynman ko ya ki yalang waphær waphær man-u-snem heiwa ha uni u snem da pynman ha chnong Muthlongrim, West Jaiñtia Hills District.
Ya kani ka yalang da pynman kam ka laad pynsñiawthooh paidbah “Awareness Programme on Common Zoonotic Diseases” yow pynche hajrong ki jait kjut wa em ha ki mrad wa ri kamjooh leh ha ki ksaw kiwa ye u yabi.
Ha kani ka sngi da emlang wa u Dr. Lofty Tyngkan deilang ka Dr. F. Rymbai, Vice-Chairperson, MVSA-JHDU deilang u waheh chnong ka chnong Muthlongrim, u Emhi Kanai.
Neiliang u Dr. Sajekiru Pakyntein da klam u hajrong ka phang “Common Zoonotic Diseases” kam ka kjut Japanese Encephalitis, Rabies wa ka Foot & Mouth Disease (FMD) wa u Dr. Manroilang K Shylla hajrong ka kjut African Swine Fever & Biosecurity Measures heiwa da khana ki ya ki laad yada.
Da pynwai ya kani ka yalang deiwa yaphyllu hapyrdi kiwa rep, kiwa chong chnong heiwa da yoh ki yei pynche na ki Doctor Veterinary kiwa man ki leh ki dkhot ka MVSA wei da pynkut ya kani ka yalang da ki kyntien khublei na u Dr. R. S.Manner, Secretary, MVSA-JHDU.
Yow tip chooh chooh deiwa rap bniah, ye phi ki paidbah u yoh ya ki kot lakdop (Pamphlets) na kiwon kiwon ki chnat ka A.H. & Veterinary kiwa em ha chnong næ hajan chnong yong phi.
Discussion about this post