Ka Meghalaya State Skill Development Society (MSSDS) hadien wa yoo ko yei mih ha ki Social Media deiwa pynbaad kawa dang chah sikai namo ka Trainee kawa da leh ya ka On-the-Job Training (OJT) ha Pune kawa em hapoh ka Government-Sponsored Skill Development Programme. Neiliang ka sorkar da ong ko wa i chngaaiñ, i bha i miat wa i burom kiwa chah sikai toh iwa kyrpang dooh wei lada em iwon iwon wa jia da leh yeiwa emkaam deiwa bood ya ki kyndon yow pynsakhiat yeiwa jia.
Kamtæ hadien wa tip yeiwa da em wa pynbaad ha ka 1 tarik uni u bnai, neiliang ka MSSDS da phah ko ya kini kiwa e kreh wa Training kiwa man kam ki Training and Placement Provider (TPP) wow yaklam ya uwi pa kawi kiwa chah sikai yow pyntikna wa biang lut waroh i jait wei lada ym biang yow pynliwan ki lada kwah ki heiwa ka sor u bahkhlieh ko yei lut i sep i bai lai bai wan.
Hadien wa jia ini da em ar ngut kiwa da jied wow liwan noh wa kynthup ya kawa booh ya ka ujor wei da pynliwan ki khlem da pynslem. Kiwi won da rai ki wow neh hapoh ka Training wei da pyntip cha ki leh wa lada kwah ki wow liwan daw pynlut ka sorkar tangwa da pteiñ wow leh ya ka Job Training hadooh wow yoh kreh ki.
Ka sorkar da pyntip ko wa da yaklam wa kiwa boon wa kynthup ya ki pulit, kiwa mihkhmat ki NGO ka Meghalaya, ki National Volunteers Meghalaya wa em ha Pune wei da pynman leh ya ka Video Conference. Hadien ini waroh ym em chem wow pynsakhiat yeiwa chah pynbaad ya ka thaw kreh kamjooh ya ka TPP.
Kiwa da rai wow pteiñ ya ka Training da ong ki wa kmen hi ki wei sñiaw chngaaiñ ki tangwa da sñiawkhia ki neidaw wa mih i pynbaad boi daw chah ktah ka Batch yong ki wei ym bien de ki bru wow thung kreh da kiwa na Meghalaya neibhah ya kawa ujor dadep wow pyntip chwa cha ka yei rukom kreh wa iwa toh u leh.
Kawa ujor da jied ko wow yoh ya ka Training hapoh ka Senior Beauty & Spa Therapist Course hadien wa yoh ko ya ka chiti tyrwa kreh heiwa da klam che yei jait kreh deilang ki kydon ini waroh. Ini toh iwa bahkhlieh da ka sorkar kawa da su ya ka bai Training, bai lai, bai sah wei da e leh ka Stipend wa ₹4,000 chi bnai heipor wa leh ki ya ka Job Training. Wei ya waroh ki kot ki sla da e cha ki bor wa toh u takit yeini.
Chooh chooh ka MSSDS da ong ko wa da em ko ki rukom krehkaam wa ki kyndon hawa jied ya ki TPP kamjooh kiwa e kreh wei ha kawi pa kawi ka bynta da sneiñ wei da yasyllok wa kiwa chah jied wow lai Training nadooh wa chwa u mih yow tip bniah ki chaphang i jiat kreh wa ki thaw kreh hadooh i rukom su chwa wow chim ki yei rai.
Da ong leh wa i kreh Beauty & Wellness toh kawa da tipmit kam ka Professional Industry wa kreh da ki bru wa em yei sap, iwa emburom, iwa biang i su wei ka jait kreh wa ye u heh u san wei ka sorkar tip ko wa em kiwa pyrchang wow yahbakla wei wow pyndooh mynsien ya kiwa lai leh Training kamjooh kiwa e kreh ya kiwa na Meghalaya.
Hanla kattæ leh da ong wa kani ka kaam dang em ko hapoh i takit wei lada chem wa em i lehbakla daw pynchitom ki katkam ki kyndon aiñ da ka thong wow pynman ya waroh ini i kaam wa leh iwa pynyoh myntoi ya ki kynroo ka jylla.
Discussion about this post