Ha iwi i rukom thied thuk-thuk wa rap phær, da jia i ha ka jylla Telangana heiwa uwi u bru da su u da ki poisa naar kiwa ₹10.
Uni uwa thied kam toh uwa tip kam u Konde Raghupathi, uwa chong chnong ka Veliminedu kawa haap hapoh ka Chityala Mandal ka Nalgonda District ka Telangana heiwa da thied u ya ka thuk-thuk Splendor Plus na Sri Vinayaka Motors wa em ha Chityala kawa chongdor ₹1.10 lak deiwa su da ki poisa naar ₹10.
U Raghupathi da wanrah u ya kini ki poisa nar cha ka Showroom hapoh boon tylli ki muna Plastic. Hadien wa yoo yeini, kiwa kreh da hap ki wow ñiaw kawi pa kawi chwa wow e kti ya ka thuk-thuk.
Kiwa boon da kylli wa lada ye u leh kamni wow thied da ki poisa nar tangwa katkam ki kyndon ka Reserve Bank of India (RBI), ki poisa nar wa ₹10 toh ki poisa hi wei katkam ka aiñ Coinage Act, ki poisa nar kiwa nadooh ₹1 chaneiñ toh ki poisa wa da tipmit da ka aiñ tangwa ym ye wow pynbor wow pdiang lada su chiboon da ki poisa naar wei kiwa pdiang chong hei mon yong ki.
Ini mut i wa kani ka dukan ye ko wow kyntait yeini tangwa da pdiang ko yeiwa da su iwa mut wa man iwa biang hanla ye wow pdiang hadooh ₹ 1000 donhi da ki poisa nar tangwa kani ka Showroom ym em kyntait ko yeiwa su ₹1.10 lak da ki poisa naar.
Ini ymtoh i sien wa nyngkong wa da jia ini ha Telangana heiwa ha u December 2022, u Eraveni Venkatesh uwa man kam u YouTuber uwa na Mancherial, da thied u ya ka thuk-thuk KTM kawa chongdor ₹2.85 lak deiwa pynemkaam da ki poisa naar wa ₹1 heiwa kiwa kreh ka Showroom da chimpor ko ya ki palat chi sngi wow ñiaw ya ka poisa.
Discussion about this post