Ka Jaiñtia National Council-Khliehriat Circle, ynnin ka sngi da lai booddien biang ko heiyatoh wa ka Supplementary Nutrition Programme (SNP) wei da yachem ko leh markhmat wa u Deputy Commissioner ka East Jaiñtia Hills.
Kam wow pynkynmoo, ka seiñ ha ka 6 tarik uni u bnai da thoh ko cha u DC hajrong i tlot i pynkrehkaam ya katai ka Scheme neibynta wow e chakri ya ki khynnah wa ki manbei ha ki Anganwadi Centre kiwa em hapoh ka Khliehriat Block.
Ka seiñ da pynche ko wa i thmu yong ka ymtoh wow pynbaad ya kiwa kreh Anganwadi næ wow khang ya ki Anganwadi Centre, tangwa yow tip bniah ya ki daw yong i eh i khor kiwa ktah ya i rukom pynkrehkaam ya ka Integrated Child Development Services (ICDS) wa ka Supplementary Nutrition Programme (SNP). Deiwa pynkynmoo ya u Deputy Commissioner heipor wa yachem wa ka Child Development Project Officer, Khliehriat, da khana ko wa ya ka yukheiñ (Indent) yoh ki du chisien ha ka 3 bnai, katwa ka thong yong ka SNP toh wow e baam 25 sngi man-u-bnai, 300 sngi ha ka chi snem.
Ha ini i yachem, u DC da kular u hakhmat ka seiñ wow chimkhia wei wow thung leh da ka Inquiry Committee wow leh yeiwa emkaam, wei ka seiñ da e ko leh yei khublei wa i sñiawngooh ya u DC wa da thung ya ka Inquiry Committee neibynta ka Khliehriat ICDS Project.
Chooh chooh ka seiñ da kyrpaad ko leh ya kani ka Committee wow paitbniah ko ya ka rukom poi ki mar baam khnang wow pyndooh yei eh wei wow pyndep leh ya katai ka thong, lada ki daw hi toh em ki ha ka rukom pynpoi mar, i khang ya ki Anganwadi Centre, wym ye ki u pynbait ya i eh wei ini da pyndooh ko yei myntoi ki khynnah, ki manbei wa punkhon kiwa toh hok u yoh myntoi da ka SNP.
Ka seiñ da ban joor ko wa i thmu yong ka ymtoh wow pyntlot ya ka ICDS tang wow pynkhlan ya ka, khnang wa waroh ki khynnah ymhoi u dooh ya ini i myntoi khamtam kiwa wan na ki manyung wa duna hei yoh i laa wa i myntoi yong ka SNP hi toh u poi ko cha waroh kiwa toh u yoh myntoi.
Discussion about this post