Ka Meghalaya High Court da chah ko wow wai biang yei dukan dai kiad pharæng namo ka Indian Made Foreign Liquor (IMFL) Retail Outlet wa em ha Danakgre, West Garo Hills, deiwa ong wa ka tre da leh ko yeiwa emkaam katkam ki kyndon aiñ hapoh ka Meghalaya Excise Act and Rules wei kiwa pyrchah ya kani ka dukan ym ye wow pdiang ki katkam ka aiñ.
Hawa pynmih ya ka hukum yow pynkut noh ya ka mukotduma, u Justice H.S. Thangkhiew, da ong u wa ka tre dukan em ko ya ka License kamjooh da yoh bor ko na ka Excise Department yow kyrriah yei dukan na Jengjal Market cha Danakgre. Wei yeini da yoh yei mynjur ha ka January 29, 2025 hadien wa pyndep ya ka Inspection wei da yoh leh ya ka No Objection Certificate (NOC) na u Nokma ka thaaiñ.
Neiliang kawa yaleh mukotduma da ong ko wa hanla da biang lut ko ya waroh ki kot ki sla, tangwa u Superintendent of Excise da phah u wow khang ya kani ka dukan hadien wa em ki seiñ wa pyrchah. Wei deiwa hap khang da man ko i dooh nong kam kawa em License kamtæ da choh ko ya ka dwar ka High Court yow yoh biang u wai ya ka dukan.
Ka yung bichaar da phah ko leh ya u Deputy Commissioner ka West Garo Hills wow pynman ki Meeting wa waroh deiwa emlang kawa yaleh mukotduma, ki bor chnong, ki heh niam deilang ki bru ka Excise wa ki pulit yow pait yei man katkam ka aiñ wei lada daw mih iwon iwon i kulmar.
Hadien wa booh ya ka Report hakhmat ka High Court da chem wa kani ka dukan ym em tyngkheiñ ko ya kiwon kiwon ki kyndon ka aiñ Meghalaya Excise Act deilang ki Rules heiwa jngai ko 200 mter na ki yungmane wa em chajan wa 300 meter na ka skur wa em chajan dooh.
Neiliang won ki bru ka Excise wa u SP da ong ki wa da chem ki yei em kiwa dai tooh yei kiad ha kani ka thaaiñ wei deiwa wai ya kani ka dukan daw lait noh na ini waroh. Tangwa kiwa mihkhmat Balang wa ki dkhot ki Development Committee da pteiñ ki wow pyrchah yeini deiwa e daw wym em kwah ki wow em dukan dai kiad hapoh ka dong ka chnong ki.
Ka yung bichaar da ong ko wa i dai kaid ymtoh i hok manbru tangwa uwon uwon uwa da ye wow pynhun yeiwa emkaam katkam ka aiñ deiwa em leh ya ka License, da em u ka hok katkam ka aiñ wei ym ye wow knieh yeini lait na iwa leh da ka aiñ hi.
U Justice Thangkhiew da ong u wa i daw wa pyrchah ki bru samen toh du nei sñiaw yong ki tangwa ymtoh won wa em yurim u yieñ hajrong ka aiñ. Ka yung bichaar da kdaw ko leh wa em hi kawi ka Restaurant-Cum-Bar kawa em License yow chong dih kiad ki bru wa jngai kam 105 meter na kani ka thaw iwa da pyntlot yei pyrchah won yeiwa em ka dukan dai kiad.
Kamtæ da ong wym em aiñ wow khang ya kani ka dukan dai kiad wei da phah leh ya ki bor aiñ bor District wym toh u pynthut ki yei krehkaam ko ha i thaw wa em ko kattæ ha Danakgre.
Ya kani ka hukum da pynmih ha ka 18-06-2026.
Discussion about this post