U Superintendent of Police ka East Jaiñtia Hills District, u Shailendra Bamaniya da ong u wa ye u man wa em ki bru kiwa chim kabu kiwa pynmih kulmar ha luti wow lai cha ka thaw pynman Public Hearing yong ka Shree Cement Ltd. kawa daw pynman mynstep ka 31 tarik.
Ki pulit da pynkhlan bha ki ya ki bor wow pait wow kdoh u khoom yei long i man wei wow pynneh yei man jai-jai ka thaaiñ neibynta i pynkhreh ya kani ka Public Hearing ka wow man mynstep ha Lumsyrman, Elaka Narpuh.
Wot hapyrdi i khlan ki bor pulit wow sonteri, da mih i kynaad nadooh na ki bynta ka yaaw Cement wa dang haap hapoh ka Sutnga Elaka heiwa heini da hap ki pulit wow kawang da ki Tear Gas neidaw wa em kiwa khang yei lai luti ki kari kiwa mut wow lai cha ka Public Hearing.
Ha Shnongrim won kawa haap hapoh ka Elaka Nongkhlieh, neiliang kiwa chong chnong da kah luti ki da ki moo kam ka dak wow pyrchah yei pynman ya ka Public Hearing kat wym pu ye u pynbait ya ki kaam wa yatoh wa ki thaw rep.
Hawa kylli chaphang ini, u SP da ong u wa ye wow man wa em ki bru wa chim kabu wow pynmih kulmar ha kam ini i por iwa da yah chei thut wa kajiak yei long i man.
Hawa kylli chooh chooh da ong u wa lada em kam kitæ i jia, ym jia de hadien hadbood, wei ya iyi wa jia daw bichaar bniah bha. Da pyntip u wa hadooh i por sngi i long i man toh iwa dang jai-jai wei ym pu tip wa lada em i sympat lathi næ kawang Tear Gas neidaw wym em Mobile Network.
Discussion about this post