Ka jingkylli kaba nyngkong eh kaba ka Thma U Rangli Juki -TUR ka kwah ban kylli ka long, hato ngi donkam ia kane ka Ropeway?
Don shibun ki nongshong shnong kiba la kynthoh pyrshah halor kane ka project, hynrei ki pynpaw da kaba ong ba kim pyrshah ia ka development ne ka roi ka par. Hynrei na ka liang jong ngi, ngi ȉeng pyrshah beit ia kino kino ki kam pynroi kiba shu leh matlah, kiba ktah ia ka ȉap ka im jong ki paidbah bad ki bym wanrah jingmyntoi ia ki nongshong shnong salonsar. Ngi pyndonkam ia ka kyntein salonsar namar kano kano ka kam pynroi ka dei ban kyntiew ia iwei pa iwei i nongshong shnong, ym tang ia ki katto katne. Kane ka Ropeway Project ha ki ranab u Lum Shyllong ka dei tang ka rongphong bad ka buh jingma ia ki umbam umdih bad ka jingshngaiǹ jong ki nongshong shnong jong ka Raid Laban bad shawei.
Kane ka Ropeway Project ka dei ka kam mutlop kaba khlem da pyrkhat ne pynshong nia bha na baroh ki liang bad kan ym ȉarap ei ei ia ki kam jngohkai pyrthei. Ki nongjngoh pyrthei ki wan kai sawari sha ka Nongbah Shillong na ka bynta ban ȉohi ia ka dur tynrai jong ka ha pneh ka mei mariang. Ki wan ruh ban ring mynsiem ia ka lyer kaba khuid bad dih ia ki um ba shngiam, ban lehkmen ha ka jingpangad ka mariang, lem bad u ‘lapbah ka lyiur bad ki umthah ka tlang. Phewse, la pynijli ia kane ka Nongbah da ki dieng nar kiba ȉeng kynjreng ha kylleng ki dong, ki jingtei dewbilat kiba bun mala ki la bujli noh ia ki ȉing tnum tin ki bym kah ia ki kjat sngi bad kiba ngi lah ban ȉohi ia ka jingitynnad jong ka sahit bneng khlem ka jingkah pynwit.
Ka jingbei tyngka ban tei ia ka Ropeway ha ki ranab u Lum Shyllong ka dei tang ka jingpynsyrwa kai ia ka pisa paidbah bad ha ka jingshisha da kane ka pisa ka Sorkar Jylla ka la dei ban shna pynbha, pynitynnad bad pynneh ia ki lynti ȉaid kjat ba ki nongjngohkai kin ȉaid kai pangad bad kiew sngewtynnad ia U Lum Shyllong. Ym tang katta ban plie lad kamai na bynta ki samla shnong ban long ki nongkdew lynti bad kiba lah ban ȉalam ȉaidkjat ia ki nongjngoh pyrthei artet bad arsut ki ranab jong u Lum.
Ka jingkam jong ka Sorkar ba kane ka Ropeway Project kan ym ktah than eh ia ka mariang ka long ka bym lah ban pdiang. Ki khlaw ki btap ki dei ki nongȉada kiba khraw tam ia ka jingim ki khun bynriew bad kiwei de ki jingthaw hangne ha sla khyndew. Lada ngi pynjot pathar ia ki khlaw, kan ktah ia ki tyllong um nyngkong bad ia kiwei de ki bynta jong ka jingim hapoh kane ka pyrthei-mariang. Wat lada ka jaka ne ka bynta jong ka khlaw ba la pom ia ki dieng kam dei thik halor ka jaka shong um ne ka jaka ba don ki tyllong um, ka jingpom ia ki dieng ha ki ranab lum kan ktah bad pynkylla ia ki jingim jong baroh kiba don hapoh ka khlaw bad ia ka jingiaid lynti ka um. Ka jingpom bad jingpynkhyllem ia ki 545 tylli ki dieng kan ktah junom ia ki tyllong um bad kane kan pyntyrkhong ia ki wah bad kan long kaba shitom ban pynneh ia ki tyllong um wat lada ngi pyrshang ban thung dieng kylliang sha kiwei pat ki jaka. Ngi dei ban kynmaw ba ym dei tang ki shnong kiba don ha ki ranab jong u Lum Shyllong bad kiba don mar syndah bad ki, kiba ȉoh umbam umdih na ki tyllong um kiba don hapoh U Lum Shyllong, hynrei ki shnong kiba bun hapoh sor Shillong ki shaniah ia ka umbam umdih na u Lum Shyllong. Ka jingpom ia ki dieng ha ki ranab lum kan wanrah ruh ia ka jingtwa khyndew ha ka aȉom slap. Ka jingpom ia ki dieng na ka bynta kane ka project ka la ktah bad pynthut ruh ia ka jingim jong ki mrad kiba dang im dang sah hapoh ki khlaw jong u Lum Shyllong.
Ka jingbei tyngka kaba la kot haduh ₹151 klur tyngka na ka bynta ban shna ia ka Ropeway ban shong sngewbha ki nongwan jngoh kai pyrthei, ka dei ka jingǹiew beiǹ ia ki nongshnong shnong jong ki shnong kiba don ha syndah ki ranab lum bad ka Sor Shillong. Kine ki shnong bad kiwei kiba don hapoh Sor Shillong kim ȉoh wat ka umbam umdih kaba thikna ba kin pyndonkam man la ka sngi, ki shnong kiba bun kim don ia ki surok, ki lynti ki syngkien kiba bha bad kim don ruh ia ki kali kamai paidbah kiba biang ba ki riewpaidbah kin pyndonkam ha ka leit ka wan bad khamtam eh ban beh sha ki kam ki jam ba man la ka sngi. Kata ka lynti Ropeway kaba tang 896 meter ka lynter kan ym lah ban weng ia ka jingdheng kali bad jingkhapngiah jong ka Sor Shillong. Pynban kan nang pynkhap niah shuh shuh ha kaba da ki spah tylli ki kali jong ki nongjngoh pyrthei kin sa ȉaid lyngba ki surok shnong kiba khim man la ka sngi. Kata ka jingong ba ia kane ka lynti Ropeway yn pyndonkam ruh da ki nongrep ban kit ban bah ia ki mar rep jong ki, ka dei tang ka jingpynthamme bad ka jingialam bakla ia ki paidbah.
Kaei kaba kham pynlyngngoh ka long ba kane ka project la pyntreikam khlem da jingkynjoh ktien ne pynlong ka jingiatai bad jingiamir jingmut lang bad ki nongshong shnong bad ki shnong kiba pher kiba don hapoh ka Sor bad khapsor. Ym shym la don ruh ki jingȉalang paidbah ban ailad ia ki paidbah nongshong shnong ban pynpaw ia ki jingsngew jong ki lane ban ai ia ka jingmynjur. Ki paidbah nongshong shnong ki don hok ban ioh ka jingpynshai bad ka jingjubab halor ka jingtreikam jong ki Dorbar Shnong namar ba ka paw ba ha kane ka Project la ȉaid lait ia ka rukom synshar shnong ha kaba iadei bad ka jingshim rai. Balei ba ka mih ka kyrteng thymmai Riat Laban? Hato ka Raid Laban, kawei na ka Raid kaba don hapoh ka Hima Mylliem, ka la kylla kyrteng sha ka Riat Laban, kumba ka paw ha ki kot ki sla jong ka Sorkar halor ka jingpyntreikam ia kane ka Project ?Mynno la pynkylla ia ka kyrteng Raid Laban sha ka Riat Laban? Mano ba leit wad Ropeway Project na ka Sorkar? Ka Raid Laban ne Riat Laban? Hato ki Dorbar Shnong ka kynthup tang ia ki nongkitkam shnong? Hato ki Dorbar Shnong bad Dorbar Pyllun kam kynthup lang mo ia ki khun ki hajar baroh jong ki shnong kiba pher kiba hap hapoh ka Raid Laban? Ka pynsuba jur ba ha kaba iadei bad kane ka project, ka sorkar bad kiwei ki bor synshar, kaba kynthup ia ki dorbar shnong ne dorbar Raid ki la iaid lait bad kheiǹ dew thala ia ka riti bat khyndew bad synshar Raid. Ka Sorkar ka kam ba dei ka Dorbar Shnong kaba tyrwa ban pyntreikam ia kane ka project, hynrei ka jingpyrshah na ka liang ki nongshong shnong pat ka paw ba ki paidbah kim tip ne bna ei ei shaphang kane. Ka jingȉakren ne jingiaphylliew jingmut tang bad ki katto katne ngut ki briew ne tang bad ki nongkitkam shnong kam mut ba baroh ki nongshong shnong ki pdiang bad mynjur ia ka project. Ki nongsynshar shnong ne nongsynshar Raid ki hap ban ai jubab halor kane.
Ngi dawa ba dei ban pynsangeh noh shi syndon ia ka jingpyntreikam ia kane ka Project namar ba ngim lah ban ngeit ne pdiang tang ia ka jingbatai ki engineer kiba plan ia kane ka Project bad ngim ngeit ruh ba kane ka project kan kyntiew ia ka ioh ka kot jong ki nongshong shnong salonsar. Ki jingeh ki ban mih na kane ka project ki long shi rta, kum ka jingtyrkhong noh ki tyllong um, ka jingtwa khyndew ka ban sa jia khah khah ha ki por slap bad ka jingkheiǹ thala ia ka riti synshar shnong. Kine ki jingeh bad ki jingma kiba ap kim iadei ne iahap dor shuh bad ka jingpynlut pynsep. Ki jingeh ki long kham khraw ban ia kaba ngi lah ban mutdur. Kane ka Ropeway project ka long kaba remdor haduh katta katta bad ka jingpyntreikam ia ka kan long tang shipor. Kane ka project kan dei sa kawei pat ka project kaba ȉap bad ka bym pynmyntoi ia ki nongshong shnong ka Jylla. Lada ka treikam kan treikam tang shipor bad kan pynmyntoi tang ia ki katto katne ngut ki khwan myntoi shimet kiba don ha ka bor.
Discussion about this post