Ka lyngkhooh dap 80 snem i yoh laitlooid ka ri India da lehkmen ka deiwa chit mynsien ha Amlarem ynne ka sngi heiwa u Nujorki Sungoh, MLA ka Mowkaiaw da embynta u kam u kongsan yow pynhær ya ka lama le rong ka ri wei wow chim ya ka Rashtriya Salute.
Da rwai leh yei National Song itæ i Vande Mataram kam chibynta wa dap ini i rwai 150 snem.
Ya ka Parade da yahkhmat da u Sub-Inspector, u R. Surong na ka Meghalaya Police deiwa chibynta leh ki skur deilang i tem sur Ka Syiem Jingsuk Band.
Ya ka Independence Day March Past Competition 2026, da yoh nyngkong da Ka Syiem Jingsuk Higher Secondary School, Amlarem heiwa ar da yoh ka Nongtalang Government Higher Secondary School, Nongtalang katwa hei wa le da yoh ka Amwi Jarain Secondary School, Jarain.
Ha kani ka sngi da yoh yei chaad i rwai na ka Nongtalang Government Higher Secondary School, ka Di Iah Synroplang VO, Amlarem wa ka Amlarem Secondary School.
Da pynkup burom leh ya kiwa lehbha wei kiwa e chakri hapoh ka Amlarem Sub-Division:
Yei naam Best Performing Anganwadi da yoh ka Sacrify Gassah, kawa kreh Anganwadi ka Lamin South Anganwadi Centre, ka Aidaroy Khyriem na Thangbuli Dongwah-I Anganwadi Centre wa ka Basi Lisa Khonglah heiwa da tipmit yei kreh chitom ki beibynta i chait i khiah ki khonboo wa ki khynnah ha waroh ki liang.
Ka Pdengshakap Primary Health Centre (PHC) kawa da yoh yei tipmit da ka National Quality Assurance Standards (NQAS) Certification ha June 2026, deiwa yoh 91.5%, da pynkup burom ka heiyatoh wa ini.
Ka Banrilang Christine Kongwang, Community Health Gender Activist na chnong Darrang da pynkup burom ka yeiwa pynchlur ko ya ki khynnah wow lai leh Check-Up wei wow yarap u chem ya kitu kiwa chitom klong snaam yow pynyoh yei sumaar dei mynkna hapoh ka Rashtriya Bal Swasthya Karyakram (RBSK) wa em hapoh ka Health Department.
U Dr. Arwin Khonglah, Sub-Divisional Medical & Health Officer, Amlarem Sub-Division and Block Programme Manager, National Health Mission, Amlarem Block da pdiang u ya ka Award neibynta ka Jarain Village Health Council (VHC) kawa man ka VHC wa krehkaam dooh hapoh ka Amlarem Block nadooh wow e dawai tika, i booddien yei chait i khiah ki manbei wa punkhon, i lai pait ya kiwa punkhon kiwa rap em hei maa wa kiwi de ki kjut ki chitom ki bru.
Da pynkup burom leh ya ka Mir Jingmutlang Cluster Level Federation Women SHG Multipurpose Co-operative Society Ltd. kawa da pynkupbor ya ki kynthai wa sah cha palatsor. Ya kani da seiñ ha u ka 1 tarik u Naikhynde 2023 kawa em Headquarter ha chnong Amshipai ka Amlarem C&RD Block wei hei yahluti ka Meghalaya State Rural Livelihoods Society (MSRS-NRLM), kani ka Federation katni da em ko 230 tylli ki Self-Help Group heiwa 2,123 ngut toh ki dkhot kynthai.
Heiyatoh wa ki kaam saam rachon namo ka Public Distribution System, da pynkup burom ya u Mechanki Syngkon, FPS Dealer ka Lailyngdoh FPS Centre heiwa da yoh u wow pyndep 100% ka e-KYC hapoh ka NFSA.
Heiyatoh wa ka puræ puthi da pynkup burom ya u Leadingstar Maria Lamin na Jawaharlal Nehru Memorial Secondary School, Lamin, uwa da yoh 19th Position ha ka Top 20 SSLC 2026.
Discussion about this post