U Montri Rangbah ka Meghalaya, u Conrad K. Sangma, ynnin ka sngi da pynbna u ₹140 klur neibynta u chna pynmiat ya ki sarok ka South West Khasi Hills District heiwa da booh u leh ya u mooyurim neibynta u pynheh ya u sarok Weiloi–Mawkyrwat–Rangthong.
Da ong u wa da leh yeini yow pynbiang sarok cha ki thaw wa em jngai na Shillong wei kiwa em cha kdong cha chmiang ka jylla wei manda ong Meghalaya ym em mut du ha Shillong donhi.
U Conrad da ong u wa ka poisa wa pynlut yow thied mooria, thied psiang man ko i pynlut neibynta ka manbei yow suk ko u poi cha Hospital, yow suk ki khynnah wow poi skur kamjooh ya uwa rep yow kit ya ki mar u cha ki yaaw ki haat.
Da ong u wa kamwa man nadooh nachwa, em ki District kiwa chah ieh dien kam ka South West Khasi Hills, ka South Garo Hills wa East Jaiñtia Hills wei kini kattæ em ki hakhmat dooh ka thong ka sorkar yow wanrah yei roi i paar.
Da kdaw u wa nadooh u snem 2018 da wanrah ki kreh wa chongdor palat ₹850 klur ha South West Khasi Hills, wei wa iwa kattæ kattu dajan poi ₹990 klur. Kini kynthup ki nadooh ki umkor, ki thaw puræ puthi, ki kaam uiñke suwari wa kiwi de.
Da ong u leh wa palat 3,200 Km ki sarok dadep chna ha Meghalaya ha ki 8 snem wa da lai iwa mut kamwa 1 Km chi sngi.
Discussion about this post