Ka seiñ Kutumba Surakshya Pasrishad (KSP) kawa na Assam, ynne ka sngi da booh FIR ko ha u OC ka Dispur Police Station, Guwahati pyrchah ya ka KSU hajrong i leh pynsih wei tympra ki ya u Statue u Swami Vivekananda wa u Netaji Subhash Chandra Bose iwa da jia ha Shillong ha ka 19 tarik heipor wa pynman ka KSU ya ka Bike Rally.
Ha ka FIR da ong leh wa ha katai ka sngi da chah tympra tympiah leh boon tylli ki kari kamai deilang ki kari ki bru samen hadooh wow tba kti leh ya kiwa uiñke suwari kiwa da wan na kiwa boon ki bynta ka ri India.
Da ong leh wa ka KSU toh kawa booh hei maa yei yatylli ka ri deiwa wanrah yei yachoon wei sñiaw yaphær heiyatoh wa ka dustur riti kiwa boon hapoh ka ri.
Chooh chooh da ong wa heipor wa pynman ya ka Bike Rally da rah ki leh ya ki dieñ ki moo yow tympiah tympra ya ki kari wei katkam ki Video wa da mih da pynyoo yei thmu toh hadooh wow pynyap bru.
Da dawa wow pynngat hapoh ka aiñ National Security Act ya u President, u Vice President, u General Secretary, u Asst. General Secretary, u Organising Secretary, u Asst. Organising Secretary wa u Information & Publicity Secretary ka KSU deilang waroh kiwa ksohkaam ka seiñ yow ye u em i suk i saaiñ.
Da ong leh wa ki jylla ka Northeast toh kiwa kær da ki ri kam ka Bangladesh wa China wei lada pynchlur sa ya ki bru wa man pyrchah ri, kiwa leh ya ki kaam pyrchah ri daw pynman yei long i man wa ye u jia iyi ræ iyi wa maa.
Da suba leh boi ka KSU yoh yarap poisa ko na kiwa na baar ri yow leh ya ki kaam pyrchah ri wei iwa jia ha ka 19 tarik pynyoo ko leh yei rukom pyrkhat wa kwah u yakhlaad noh wa ka India wei rap maa ki bar ya ki Terrorist kiwa pynyap ya ki Tourist ha Pahalgam ka Jammu & Kashmir.
Ya kani ka FIR da booh da u Satya Ranjan Borah uwa man kam u President ka KSP.
Discussion about this post