U SP ka East Khasi Hills da pyntip u wa ha ka 23 tarik uni u bnai heipor kamwa 5:40 i step, da pyntip cha ki pulit ka Mawngap Police Station wa em 3 ngut kiwa suba toh kiwa tooh kiwa da yoh wow kem ha 11 Mer, Mylliem.
Kamtæ ki pulit da lai ki cha kani ka thaw heiwa da chem wa em ki bru wa boon kiwa dat ya kini ki le ngut kiwa suba toh kiwa tooh kiwa tip kam u Banshan Kurbah (25 snem) uwa na Mairang, Lumkyllang, u Albert Marbaniang (26 snem) uwa na Mawlai Mawtawar wa ka Ilabet Kharmawlong (27 snem) kiwa na Mawkau Mawtawar.
Neiliang ki pulit da yaleh ki wow pynlait ya kini ki le ngut na kti ki paidbah wei ha ini i por da chah tba kti leh ki pulit wei da chah maisih maisang ki wei da pteiñ ki paidbah wow dat ya ki le ngut.
Hadien wa ye u sai ya kini ki le ngut, wei da lai booh ki cha Pomlum PHC yow yoh sumaar wei hadien cha Mawngap PS yow yoh yei yada. Da lai taan leh ya ka kari Maruti Car kawa em Number ML-05T-9837 kawa pynemkaam da kini ki le ngut chapoh ka Police Station.
Hadien ini da pynlait ya waroh kini ki le ngut neidaw wym em wan wow booh ujor pyrchah ya ki.
Neiliang ki pulit da booh hi ki da ka Suo-Moto Case ha Mawngap PS yow takit yeiwa jia wei da yoh wow kem ya ar ngut kitæ u Armingson Kharkongor (37 snem) uwa na Mylliem Kyndong, 11th Mile wa u Pynshaiborlang Kharkongor (33 snem) uwa na Mylliem Kyndong kiwa man kam kiwa yahkhmat yow dat ya ki le kiwa suba kiwa tooh.
Ya kini ki ar ngut da rah ki hakhmat ka yung bichaar wei ka takit dang lai ko chakhmat.
Ki pulit da kyntu ki ya ki paidbah wym toh u chim ya ka aiñ ha kti tangwa wow pyntip cha ki pulit deiwa Phone ha u 112 lane cha ki pulit wa em chajan.
Discussion about this post