U Montri Rangbah ka jylla, u Conrad K Sangma da e jubab u yei dawa u MLA ka Nongkrem, u Ardent M Basaiawmoit yow sangeh noh yei booh ya ki Coke Plant wa Cement Plant kiwa man leh kam kawi na ki 10 tylli ki mat dawa wa da booh hakhmat ka sorkar ynne hapoh ka yung dorbar chna aiñ.
U Conrad hawa e yei klam da ong u heiyatoh wa ki Coke Plant i thooh ya kiwa krehkaam pyrchah aiñ dang pteiñ i da ka Meghalaya State Pollution Control Board yow pyntikna wa da bood ki katkam ki kyndon aiñ wei kitu kiwa krehkaam khlem da yoh bor da tympra ki.
Da khana u wa hapoh ka Phase 1 ha u July 2023 dadep wow tympra 39 tylli ki Coke Plant kiwa em ha West Khasi Hills wa 5 tylli kiwa em ha East Jaiñtia Hills.
Ha ka Phase 2 ha u snem 2025 da tympra 17 tylli kiwa em ha West Khasi Hills wa 11 tylli ha East Jaiñtia Hills District.
Waroh kini dapoi ki 72 tylli kiwa dadep tympra.
Heiyatoh wa ki 11 tylli ki Cement Plant wa em ha East Jaiñtia Hills da ong u wa kini toh kiwa da pait da sylli yei krehkaam ki lyngba ki Pollution Control Devices wei kini man ki da ka Online Monitoring.
Chwa wow booh ya ki Cement Plant da em leh ki kyndon kiwa rkhiñ deiwa hap u yoh ki Environmental Clearance wei u pynman Public Hearing wa kiwi de.
Wei u sdang ya kini ki ar jait ki karkhana ym chah khlem da yoh bor wa kynthup ya ka Consent to Establish (CTE) wa ka Consent to Operate (CTO) na ka Pollution Board.
Kamtæ ka sorkar u pyntikna ko wa ki karkhana wa wan u krehkaam ki katkam ki kyndon yow yada ya ka rymaw, ka la’ær wa i chait i khiah ki paidbah.
Discussion about this post