U MLA ka Nongkrem, u Ardent M Basaiawmoit ynne hapoh ka yung dorbar da wanrah u ya 10 tylli ki mat dawa na ka VPP ya ka sorkar wei kam chibynta kini toh yow wai noh yei khang mooyong, khang tih moo tih chyiap deiwa ye kiwa khian wa nai u tih deiwa ye leh wow yada ya ka bei rymaw.
Neiliang u Conrad K Sangma hawa e yei klam da ong u wa ym em i khang yow tih mooyong kamjooh u tih chyiap wei wow tih moo tangwa hap donhi wow bood ya ki kyndon. Da pynche u wa hadooh ka Supreme Court leh ha ka hukum wa da pynmih ym em khang ko wow tih mooyong tangwa da ong donhi wa hap wow bood ya ki aiñ tih marpohkhyndaw kamjooh ki aiñ yada rymaw.
Da ong u wa ki kyndon wa da em kattæ toh iwa da chem chitom kiwa tih mooyong u pynhun heiwa da emkaam hadooh 100 Hectare wei i rukom tih deiwa leh da ka Open Cast Mining leh ym yahaap cha i neidaw wa stang ki paar moo.
Wei kam ka sorkar dang ini wa dep da yachem ko wa u Montri ka sorkar pyrdi yow dawa pynkylla ya ka aiñ yow ye u tih mooyong da kiwa khian bor deiwa pynjem ya ki kyndon heiwa u Montri ka sorar pyrdi da phah u wow thung da ka Committee ka wow pait yeini wei kani ka Committee daw chong yachem ko ha kini ki 20-30 sngi.
Heiyatoh wa i tih chyiap tih moo, u Conrad da ong u wa katkam ki kyndon ka sorkar pyrdi da emkaam wow yoh ya ka Environmental Clearance wei ya kani ym ye de wow yait.
Da pyntip u wa dadep leh wow thooh ki kyndon aiñ yow pynlait ya kiwa tih deiwa khian tangwa ym em chem wa em kam kattæ.
Discussion about this post