Ka Behdieñkhlam ka Seiñ Raij Mukhla ynne ka sngi Musiang dapoi ko cha ka sngi wa le heiwa ki khon chynrang wa kynthai ka Raij da mih paidbah ki deiwa yachemlang ha Madan Ei Yadaw Rong dep tæ lai chaad sngi ki cha chnong Mukhla Chohchrieh, Ladmukhla hadooh wa poi ha ka chnong Umlangchor wei hadien wa chaad sngi ki ha Mukhla Umlangchor da rah ya u Khnong Blai uwa man u Dieñkhlam ka chnong Mukhla Umlangchor hadooh wa poi ha madan Ryngkaw ha Mukhla Nongrim madan Slot Masi, heiwa da pynyieñ wei thung ya ki le tylli ki Dieñkhlam uwi ha Wahchnong Tre Blai katwa ar tylli won ha madan Slot Masi madan Ryngkaw.
Kamtæ hadien wa dep u thung ya ki le tylli ki Dieñkhlam, da yoh biang u chong ya ka Dorbar Niam ha madan Slot Masi hapoh i yahkhmat u Pa Langdoh chirup deilang wa ki Waheh Sankur wei ha kani ka Dorbar Niam da yaklam ya pynbait ya ki kaam kiwa toh u leh neibynta ka sngi Muchai ka sngi pynkut ya ka Lehniam Behdieñkhlam.
Ka chnong Mukhla Nongrim da mih ko dang step yow lai cha khloo yow lai daiñ ya ki ar tylli ki Dieñkhlam, kamtæ ynne hadien wa da wan daiñ heipor por 10:30, ki khon ki hajar ka Seiñ Raij Mukhla da ya mih paidbah ki wei da lai li rah ki ya ki Dieñkhlam hapoh i yahkhmat u Pa Langdoh chirup wa ki Waheh Sankur Sankmai, u Maji, u Chutia wa u Sangot.
Kamtæ hadien wa da wanrah, da booh uwi u Dieñkhlam ha madan Tihkhyndaw ha ka Dong Wahchnong, katwa ya uwi won u Dieñkhlam heh da booh ya oo ha Madan Ryngkaw ha Slot Masi.
Ha kani ka sngi wa le yong ka Lehniam Behdieñkhlam ka Seiñ Raij Mukhla da yoh leh ya ki kyntien snieñ kyntien kroo na u Wailadmiki Shylla, MLA ka thaaiñ uwa man leh kam u Montri sorkar.
Discussion about this post