Ka jylla Meghalaya lyngba ki 60 ngut kiwa mihkhmat, ynne ka sngi ka 26 tarik da mynjur ki yei rai hapoh ka Yung Dorbar Chna Aiñ wym chah ya ka sorkar India lane ya kiwon kiwon wow ktah ne mutdur u tih ya u Uranium uwa em ha ka jylla.
Ya kani ka Resolution da wanrah da u Montri Rangbah ka jylla, u Conrad K Sangma hapoh ka Yung Dorbar heiwa da ong u wa kani ka rai toh ka khubor wa khlan cha ka sorkar India wa kiwa mihkhmat deilang ki paidbah ka jylla wa yatylli ki hajrong kani ka rai, wei la kammon kammon ym chah wow tba ya u Uranium hapoh ka jylla.
Da ong u wa ki thaw ha Meghalaya toh kiwa mantre da ki chong, ki hima wa hapoh i yada wei pait da ka District Council kamwa da e bor ha ka Sixth Schedule ka Constitution ka ri.
Hachwa wow chimlang ya kani ka rai, da chimbynta leh wow yatai wei e yumut da kiwa mihkhmat (MLA), nadooh uwa yahkhmat ka Liang Pyrchah, u Dr. Mukul Sangma deilang u Ardent M Basaiawmoit, u Renikton L Tongkhar, u Paul Lyngdoh, ka Miani D Shira, u Olan Sing Suin, u Brightstarwell Marbaniang, u Rakkam A Sangma, u Adelbert Nongrum, u Heaving Stone Kharpran, u Charles Marngar, ka Mehtab Chandee A Sangma, u Dr. Mizanur Rahman Kazi, u AT Mondal, u Pius Marweiñ, u Mayralborn Syiem, u Rupa Marak wa u Banteidor Lyngdoh.
Hadien wa dep i yatai, u Lamphang ka Yung Dorbar da booh u yei kylli hapoh ka dorbar heiwa waroh da mynjur ki wei da pynbna u wa ka Yung Dorbar Chna Aiñ ka jylla da chim ko ya kani ka rai yow pyrchah tih ya u Uranium na ka jylla.
Discussion about this post