Ka MYBharat Jowai, kawa man kawi ka Autonomous Body hapoh ka Ministry of Youth Affairs & Sports ka sorkar India deilang wa ki NSS Unit ka West Jaiñtia Hills wa East Jaiñtia Hills daw pynman ki ya ka rynsan “Khelo India Samvaad” ha ka 27 tarik uni u bnai kam chibynta ka National Sports Day.
Kani ka Program toh kawa thmu yow wanrahlang ya ki khynroo khyllood, kiwa yalehke Sports wa kiwa man ka mynried ka yalehke ka ri ha kawi ka rynsan deiwa pynlai yumut bha ha i ya chimbynta ki khynroo khyllood, i pynku yei pynkhreh yalehke Sports wa i tei ya ka ri.
Kam chibynta kani ka Program, ki khynroo khyllood daw yoh ki u ap yei klam u Prime Minister, iwa daw bood won da ka Yuva Samvaad ha ki thaaiñ, yow e laad ya ki khynroo khyllood u yachem, u yaklam wa kiwa yalehke wa bna naam wa kiwa mihkhmat paidbah, yow saam yeiwa tip, ki buit wa ki thong yong ki.
Ha West Jaiñtia Hills, ya kani ka Program da pynkhreh u pynman ha ki ar tylli ki thaw, kitæ ka Thomas Jones Synod College wa Kiang Nangbah Government College. Ha East Jaiñtia Hills won, daw pynman ha ki ar tylli ki thaw kitæ ka Don Bosco College, Byndihati wa Jaintia Eastern College, heiwa da yooluti wa ym duna ya 250 ngut kiwa daw wan chimbynta.
Ka Yuva Samvaad u pynlai ko yei bor ha ki bynta wa kongsan kam i pynkhlan ya ka rukom pynku ya ki kaam Sports, i pynpliah yei sap i tap neibynta ka 2030 Olympics, neitæ i yahkhmat ki khynroo khyllood wa i chimbynta ha ka synchaar khadar, wa i e laad ya ki khynroo khyllood u yasyllok wa kiwa yalehke wa bna naam wa kiwa mihkhmat paidbah, yow yoh mynsien na kiwa da jop ha ki yalehke Sports yow pynchlur wei yahkhmat ya ki mynried ha ka yalehke Sports wei wow ya chimbynta ki khynroo khyllood ha i tei ya ka ri.
Kani ka Program da yooluti wa daw yoh yei chimbynta wa chongchit na ki khynnah skur wa ki khynroo khyllood na ki thaw puræ waphær waphær hapoh ki District ka Jaiñtia Hills, deiwa pynkhlan chooh chooh yei mynsien yalehke Sports, i chait i khiah (Fitness), i yahkhmat wa i chimbynta wa tei ya ki khynroo khyllood.
Discussion about this post