U Chief Minister ka jylla u Conrad K Sangma da pyntip u wa em 666 tylli na ki 6,188 tylli ki Anganwadi Centre ha ka jylla wa krehkaam ki na ki yung wai næ ki yung wa chipor neibhah ka sorkar ym em thaw ko u chna yei yung wa paka wei ym em poisa ko wow chna pynmiat ya ki yung wai.
Hawa jubab yeiwa kylli u MLA ka TMC, u Dr Mizanur Kazi, u Conrad da ong u wa i chna kamjooh i chna pynmiat ya ki 2,148 Centre da lai i chaphrang dei krehlang ka Rural Development Department wa ka MGNREGS, heiwa da yoh Rs. 64 klur na ki Externally Aided Projects neibynta i jooh.
Na ki 2,148 tylli ki Centre, 1,670 tylli toh kiwa dadep chna wei kiwa sah leh daw pyndep noh ya ki heiwa i chna pynmiat da leh hapoh ka Meghalaya Early Childhood Development Mission.
Chooh chooh da pyntip u wa ha ki Anganwadi da e baam 25 sngi ha ka chi bnai hapoh ka Supplementary Nutrition Programme wa kynthup yei baam wa iñ wa dang dep chet kiwa da saam ha ki Anganwadi Centre da ka kawa kreh kam ka Anganwadi neibynta ki khynnah kiwa 3 hadooh 6 snem.
Em leh ki mar baam wa ye u rah cha yung wei yeini da leh chisien chi tayaaw neibynta ki kynnah kiwa nadooh 6 bnai hadooh 3 snem i rta neitæ ya ki kynthai wa punkhon, ki manbei wa dang dep kha khon wa ki khynnah wa dang khai khynroo.
Najrong ini ka sorkar dang pyrkhat ko leh wa leh noh yeini ar sien chi tayaaw deiwa e leh deilang wa ki pylleiñ.
Discussion about this post