Ynne ka sngi da pynman ya ka Marathon kawa man chibynta wow lehkmen ya ka Rajya Jal Utsav da ka yung krehkaam ka PHE RWS Division Jowai, West Jaiñtia Hills District deiwa ya krehlang wa ka District Sports Officer, West Jaiñtia Hills District, Jowai wei chwa wow sdang ka Marathon, da yoh yei batai bniah ya ka luti (Route) wow phet da kiwa kreh ka District Sport Office, West Jaiñtia Hills District.
Ha ka yaphet ki chynrang da kaweh lama namo Flag Off da u kongsan, u P. Lyngdoh, uwa man u Chairman ka Jowai Municipal Board hei emlang u E.E. ka PHE, RWS Jowai wa u SDO Electrical.
Ha ka yaphet ki kynthai da kaweh lama da ki ar ngut ki SDO yong ka Jowai Sub-Division, wa ka SDO ka Amlarem Sub-Division.
Kiwa wan chimbynta ha pyn ar ki yaphet da em ki palat 200 ngut.
Hawa kut ka Marathon (ha Madan Jrisaleiñ) da pynlai ya ka yalang da u H. Bareh, wei da yoh yei klam tbian na u Executive Engineer ka PHE RWS Jowai, u S. Najiar.
Ya ki Prize ki chynrang da saam da u P. Lyngdoh katwa ya ki kynthai da saam da u E.E. PHE, RWS Jowai, cum Member Secretary West Jaiñtia Hills District.
Ya ki Special Prize cha kiwa kian rta dooh wa kiwa heh rta dooh da saam da ka SDO Jowai Sub-Division, ka L. Pasi wa ka SDO ka Amlarem, Special Investigation Amlarem, ka D. Ksoo.
Yei klam e khublei da yoh na u R. Challam uwa man u SDO ka Electrical Sub Division Jowai, West Jaiñtia Hills District uwa da e khublei yei man ka yaphet pyllah kawa jop.
Ha kani ka yakob, ki kynthai da phet ki 5Km katwa ki chynrang won 10Km heiwa kiwa yoh nyngkong da yoh ki Rs. 10,000, kiwa yoh wa ar Rs. 7500 katwa kiwa yoh wa le da yoh ki Rs. 5000.
Kiwa jop ha ki kynthai man ki kamni ha wah:
1st – Marwa Shylla (26.49 min)
2nd – Happiness Phawa (27.22 min)
3rd – Pynbait Shylla (27.33 min)
Ha ki chynrang kiwa jop man ki kamni ha wah:
1st – Junom Phawa (39.26 min)
2nd – Wandathrang Phawa (39.36 min)
3rd – Sanctify Pale (40.12 min)
Discussion about this post