Hadien wa ka Union of Cook cum Helpers PM Poshan Meghalaya da pynbna ko yei rai yakhih deiwa sangeh lai chet ja sngi ha ki skur neidaw wym ap sñiaw ka sorkar bei yei dawa pynku ya ka Central Share cha ka Rs. 9000 neiwa jooh e ko Rs. 900, kamtæ neiliang ka All Jaiñtia Mid Day Meal Workers Union (AJMDWU) kawa man ka seiñ kiwa chet ja sngi ha ki skur ha ka yalang wa da pynman ki haka 1 tarik uni u bnai ha Yungwalieh Loomiongkjam Jowai, ki leh da chim ki ka rai u ya ksohktilang wei kyrchaan pura deiwa dam u lai chet ja skur.
U President ka All Jaiñtia Mid Day Meal Workers Union, u Jerry Anderson Suting ong u i daw wa hap sangeh toh hadien 7 tylli ki snem wa kam ka seiñ kiwa chet ja sngi ha ki skur da phah ko dei thoh dawa ki wot chadooh u Prime Minister ka ri India, u Narendra Modi wa kamjooh wa cha kiwi ki Montri sorkar pyrdi wow pynsñiaw yei eh wa maad ki kam kiwa chet ja skur ha kani ka thaiñ wa yoh ki du Rs. 2000 chi bnai.
Ong u wa hei sakhiat kam ka seiñ da kyrpaad ki wow pynku ya ka Central Share na ka Rs. 900 cha ka Rs. 9000 chi bnai khnang wa kam kiwa chet u ye ki u im wei pyndap pynbiang ya ka yung ka sem.
Da kyrpaad ki leh ya ki School Managing Committee, kiwa sikai, kiwa yahkhmat ha ki chnong ki thaw wow e ki i yakrehlang chirup wa kiwa chet ja skur khnang yow mankaam i dawa ki.
Sa iwi leh ong u ini ymtoh du kat i dawa kiwa chet ja sngi ha ki skur tangwa yoo ki leh lyngba i lai bait kani ka Scheme yoh myntoi ki khynnah skur kamjooh ki manyung wa dooh wa duk.
Discussion about this post