Da khut ya ki khynroo khyllood ka East wa West Jaiñtia Hills wow chimbynta ha ka Viksit Bharat Young Leaders Dialogue 2027

U District Youth Officer (DYO) ka Mera Yuva Bharat Jowai, u S.T. Haokip da khut u ya ki khynroo khyllood yong ka West Jaiñtia Hills wa East Jaiñtia Hills wow chimbynta ha ka Viksit Bharat Young Leaders Dialogue (VBYLD) 2027 kawa daw pynman kam chibynta yong ka National Youth Festival hapoh i pait i yoo yong ka Ministry of Youth Affairs & Sports ka sorkar India.

Ka thong yong kani ka VBYLD toh wow e laad ya ki khynroo khyllood wow yoh ki ya ka lympung ha ka kyrdan ri (National Platform) wow pynyoo ya ki sap yong ki, ki bor yahkhmat wa ki buit wa thymme, kamjooh wow noh kyllooid cha ka thong yong ka Viksit Bharat@2047.

U DYO da pyntip u wa ki khynroo khyllood kiwa em nadooh 15 hadooh 29 snem i rta toh kiwa da biang bor wow chimbynta ha kani ka lympung kawa em ynru tylli ki bynta: Viksit Bharat Challenge, Cultural Track, Design for Bharat, Hack for Social Cause, Youth Entrepreneurs Challenge wa ka Viksit Bharat Youth Parliament.

Da pyntip chooh chooh u wa ya ka Viksit Bharat Challenge daw pynman hapoh ka North East Frontier Region (Purvodaya) deiwa em ka mat pdeiñ (Theme) “Act East, Connectivity & Cultural Leadership” neibynta ka jylla Meghalaya.

Related posts

Chah khyrrup kiwa kreh sorkar hawa mut wow lai yarap ya u khla wa mynsoo

September 9, 2026

Da ki khon ki tngoo ki wym jooh em ha India chem na iwi i khloo ha Odisha

September 8, 2026

Kani ka yakob daw lai ko lyngba ki kyrdan waphær waphær wa kynthup ya ka Viksit Bharat Quiz, Essay Challenge, District Championship, State VBYLD wa ka National Round. Ya ka National VBYLD da booh tarik wow pynman ha New Delhi nadooh 10 hadooh 12 tarik u Duyatra (January), 2027.

Ha ka bynta yong ka riti dustur (Cultural Track) daw em ki yakob chaad tynre (Folk Dance), rwai tynre (Folk Song), dro dur (Painting), i klam hakhmat paidbah (Declamation) wa i thoh Poetry, heiwa kiwa chimbynta daw chah jied nadooh ka kyrdan District hadooh ka State wa National Level. U DYO da kyntu u ya waroh ki khynroo khyllood kiwa da biang rta yong ka East wa West Jaiñtia Hills District wow chimbynta chitrhem ha kani ka Viksit Bharat Young Leaders Dialogue 2027 deiwa pynpsiah pyrtuid lyngba ka MY Bharat portal (https://mybharat.gov.in). Da pynche chooh chooh u wa ki khynroo khyllood kiwa dadep pynpsiah pyrtuid ha ka MY Bharat portal ym emkaam de wow Register biang.

Kani ka thong man ko wow e laad ya ki khynroo khyllood wow pynsäiaw ya ki pyrkhat thymme, u pynku ya ki sap yahkhmat wa u noh synñiang chongkun cha i pynchna ya ka ri neibynta ka Viksit Bharat @2047.