Ki paidbah wa chong chnong ka Bamkamar, West Jaiñtia Hills District, wa haap hapoh ka Nartiang Elaka, ynne ka sngi da lum yalang ki ha Hall ka Bamkamar L.P. School yow rai pyrchah yei thung Acting Waheh Chnong ka JHADC wa u Dolloi ya u Medris Nongrum, wot hawa neiliang ki paidbah wa boon da dawa ki wow pynman da ka Election jied waheh chnong wa pura hadien wa da kut ka samoi krehkaam u waheh chnong warim, u Thomlin Rynjah.
Ini i kynrum kynram waheh chnong ha kani ka chnong Bamkamar da mih i hadien ka dorbar wa da pynman khaddooh ha ka 03-06-26 kawa man ka dorbar pynbna wa da kut ka samoi krehkaam u waheh chnong warim wei da toh u jied thymme. Wei da ong wa ha katai ka por ki kattu katni ki waheh wa em na ka miej da pyrchang chimbor ki wow thung da uwa kwah wa ngait ki katwa ki paidbah wa boon walang won kwah kwah ki u jied waheh chnong pura deiwa thap Vote khnang yow man iwa pynhun ya warohlang, wei heitæ mih i pynyoo nia.
Hadien ini ki paidbah da lai pynsñiaw ki cha u Dolloi ka Elaka Nartiang wa cha JHADC wa toh u pynman da ka Election, heiwa neiliang u Dolloi ym em jubab u iyi iyi, katwa ka JHADC hadien da jubab ko wa u Dolloi ong u wa em i awri awra ha chnong Bamkamar.
Chooh chooh u Dolloi da phah jubab haroh u cha JHADC wow ong wa da leh u yei kaam deiwa lai hiar cha Bamkamar tangwa neidaw iwa chem u, ym ye u pynman jied waheh chnong kamtæ da pyrkhat u thung noh da u Acting Waheh Chnong.
Hajrong ini neiliang u Thomlin Rynjah uwa man kam u waheh chnong warim kam uwi wa embyntalang wa ki paidbah wa kwah jied waheh chnong thymme da ka Election, ong u wa ym em iwon iwon i awri awra hapoh Bamkamar lait du i kwah donhi ki paidbah u jied waheh chnong da ka Election, wei i pynche wa e dei thoh u Dolloi cha JHADC sñiaw kamwa da wan mih u da oo hi hawa wot tang chisien leh ym em wan hiar u da oo yow sakhi takit yei sakhiat.
Hajrong i lai yachem ki boonsien cha u Dolloi leh deilang i e dei thoh, ong u ym em yoh jubab ki iyi iyi na oo, heiwa kawi ka jubab naka JHADC won ong ko wym ye de ki u leh iyi iyi neibhah wa u Dolloi da dep e mynjur wow thung da u Acting Waheh Chnong.
Neiliang ki paidbah won ym em pdiang ki yeini i thung Acting Waheh Chnong neibhah wa nadooh wa sdang dadep lai booh ki dei thoh chwa wa toh u pynman bait da ka Election yow jied da u waheh chnong wa pura khnang yow suk wei lai bait ryntih ki kaam chnong kaam thaw.
Ha kani ka sngi ki paidbah kynthai wa chynrang da chimbynta ki u beiñ yeiwa leh u Dolloi deiwa kyntu ya ka JHADC wa toh u chimkhia ko yeini i kaam yow pynman smat ya ka Election jied waheh chnong deiwa yoh u chimbynta da waroh ki paidbah wa chong chnong, heiwa lada jop uwon uwon leh da hun hi ki tang wada yoh u pyndep yei hok.
Heijooh i por da rai ki wa lada ka JHADC ym leh ko iyi iyi hajrong ini i dawa yong ki ym yohsa ki u lai da kawi won ka luti.
Discussion about this post