Hadien wa ka jylla Assam wa ka Arunachal Pradesh da pynku ki ya ka dan Excise Duty yong ki, neiliang ka sorkar Meghalaya leh da rai ko wow pynkylla yei rukom kheiñ dan yow lait ware u duna ka dan hapoh ka jylla hawa nujor wa ki ar jylla.
Ka Assam da wanrah ko da ka Minimum Guaranteed Revenue neibynta kiwa dai Wholesale wa Retail wei deiwa leh kamni da antaad wa da ku i dor kiad da 7-12%. Neibynta ki thaw chong dih kiad kam ki Bar wa kiwi de, da chah wow dai ki du da i kiad wa em ha u klong 750ml, ym chah da kiwa khian yeini ki klong.
Yow lait ka Meghalaya u dooh nong, da rai leh wow pynku dor ya ka dan Excise yow lait ware u heh i yaphær dor wa kiwi ki jylla wa em chajan heiwa ki da kheiñ ki da ka dan Excise wa thymme ya ki kiad waphær waphær iwa mut wa ye u ku dor i kiad hapoh Meghalaya.
Deiwa pynku ya ka dan daw yarap ko leh ya ka sorkar wow pynku yei yoh nong sa ₹150 klur hawah haneiñ.
Yow leh yeini, ka sorkar Meghalaya da chim rai wow kheiñ deiwi namo ka Re-Classification ki jait kiad Indian Made Foreign Liquor (IMFL), u pynkylla ya ka dan Ad Valorem wei wow pynkylla leh ya ka Rule 376 ka Meghalaya Excise (Amendment) Rules, 2026 wa ka Rule 41 ka Meghalaya Bonded Warehouse Rules (Amendment) Rules, 2026 yow kheiñ yei dor wa thymme.
Da pynkylla leh ya ka Excise Duty wa ka VAT heiwa kattu u kheiñ noh ki kawi donhi hapoh ka Ad Valorem heiwa nachwa ya ka VAT da leh da ka Taxation Department tangwa kattu u kheiñlang ka wa ka Excise Duty wei ya kani ka dan u pait da ka Excise Department donhi.
Ini mut i wa lada nachwa chim ₹100 kam ka Excise Duty wa ₹100 kam ka VAT, kattu u kheiñ ka kawi donhi kawa ₹200 ka wow man kam ka Ad Valorem yow pynsuk yei rukom pynlang dan.
Discussion about this post