Ki MLA ka Meghalaya hei yahkhmat u Speaker ka Assembly, u Thomas A. Sangma, da lai ki cha ka Pieta Military Cemetery wa em ha ka ri Malta ha Europe heiwa da chem ki yei thaw tlep yong ki le ngut ki Garo kiwa em hapoh ka 69th Garo Labour Company heipor wa jia ka World War-I.
Chwa ini da tip donhi wa yei thaw tlep u Khew Marak uwa da yap ha ka 15 tarik u June 1918 uwa man kam u Garo uwa em hapoh ka 69th Garo Labour Company uwa da tlep ha kani ka thaw tangwa deiwa lai cha kani ka thaw da chem yei thaw tlep ki le ngut kiwi ki Garo kitæ u Ading Marak uwa da yap ha ka 10 tarik u June 1918; u Sangjim Sangma uwa da yap ha ka 19 tarik u June 1918 wa u Join Marak uwa da yap ha ka 10 tarik u June 1918.
Heipor wa em ka World War-I ki chynrang na Garo Hills da pynpsiah ki hapoh ka 69th Garo Labour Company wei i kaam ki toh yow pynchna sarok kamjooh wow kit u bah wei wow pynpoi ya ki mar wa emkaam.
Neiliang u Speaker da ong u wa ini wa chem toh iwa emkaam bha neibhah wa kattu da tip yei thaw tlep ya kini ki bru Garo kiwa da e dei mynsien heiwa nachwa ym tip yei pyrtuid ki leh.
Da ya emlang ha ini lai cha kani ka thaw wa u Deputy Speaker, u Limison D. Sangma, u Deputy Chief Whip, u Ronnie V. Lyngdoh wa u Chairman ka Meghalaya Tourism Development Corporation, u Marthon J. Sangma, MLA.
Ini i lai cha Malta man ko kam chibynta ka Study Tour hadien wa kut ka Commonwealth Parliamentary Association (CPA) Conference wa da pynman ha Cape Town, South Africa heiwa ya katai ka thaw tlep ya ki chipai da pait da yoo da ka Commonwealth.
Ya kiwa na Meghalaya da pdiang sñiawbha da ka High Commission of India ha Malta, wei ini i chem yei thaw tlep man ko leh yow tipmit yei embynta ki Garo kiwa da lai cha chiliang duriaw heipor ka World War-I.
Ha ka Military Cemetery wa em ha Europe chem yei thaw tlep ya kiwa na Garo kiwa yap ha ka World War-I
© 2026 WYRTA Khubor Hei Ktien Pnar
Discussion about this post