Uwi u bru uwa jooh kreh kam u Security Guard da chah kem u deiwa chah pynbaad wa rahbor wei pynyap u ya kawi ka khynnah kawa dang 5 snem na thaw sah ko wa tip kam i Villa Orchids, Kowkoor wa em ha Hyderabad dei thmu wow dawa Rs. 20 lak na ka yung ka sem ko.
Uni uwa chah kem da tip kam u Vikram Kumar uwa na Nalanda District ka Bihar wei da jooh kreh u kam u Security Guard ha kani ka Villa Orchids nadooh ka 22 tarik u September hadooh ka 6 tarik u October uni u snem.
Kani ka khynnah da wiar ko ha ka 10 tarik uni u bnai wei yei metyap ko da chem na kawi ka thaw pynlang um wa em ha tyngkong ka Clubhouse ha tre kani ka thaw sah ki bru hadien wa da pynman yei thooh ya ka.
Kani ka khynnah kamwa jooh myllien ko, da kyndeh ko da ka Cycle ha ki thaw wa da booh yow kyndeh ki khynnah nadooh 6:00 waje i janmiet hadooh 7:00 waje i miet, tangwa ha katai ka sngi ka 10 tarik ym em liwan ko, wei hadien da yoh Phone ka yung ka sem ko na u bru wym tipmit uwa da ong wa da rahbor u ya kani ka khynnah heiwa da dawa u Rs. 20 lak wei da kam u wa em u ha Secunderabad.
U pa kani ka khynnah toh u Milton Fernandes Moses (44 snem) uwa man kam u Research Scientist wei ha katai ka sngi manda poi yung u heipor kamwa 7:45 da khana ya oo yeiwa jia uwa da lai booh ya ka ujor ha ki pulit.
Neiliang ki pulit da thung ki 10 tylli ki Special Team wei nyngkong da pyrchang wow Track ya u Phone Number wa pynemkaam yow dawa poisa, kamjooh da pait leh ki CCTV tangwa ym em poi cheiwon cheiwon.
Kamtæ da rai wow thooh kynreh chwa pyn hajan kani ka thaw wa jooh kyndeh ka khynnah wei da chem yei metyap ko napoh ka thlu pynlang um.
Hei takit ki pulit da suba ya u Vikram Kumar uwa jooh kreh ha kani ka thaw wei da lai wow kem ya oo uwa da phla wa ha ka 10 tarik da psiah u cha kani ka thaw heipor kamwa 6:40 i janmiet deiwa thmu wow rahbor ya kani ka khynnah yow dawa poisa wei da leh u yeini neidaw wa kwah u wow mahajon neibhah da ngiah u wow kreh mylla.
Da phla u leh wa da pynyap noh u ya kani ka khynnah hadien wym ye u wow pynsuki ka wei daw jinjar wow murieh ka wei hadien wa pynyap da noh u yei metyap ha kani ka thlu um.
Da chem leh wa u Vikram da pynemkaam u da ka SIM Card yong uwi won u bru uwa kreh kam u Security Guard ha kani hi ka thaw wei da Phone nyngkong u cha u pa ka khynnah tangwa ym em jubab wei hadien won da Phone u cha u papun kani ka khynnah.
Hadien wa pynyap u ya ka khynnah da lai yut u cha Secunderabad.
Ki pulit da pait ki ya 130 tylli ki CCTV wa em ha kani ka thaw heiwa ha kawi da yoo ya u Vikram wa mih u na kani ka thaw samen iwa da pynpyrkhat ya ki wa ka khynnah dang em ko ha kani hi ka thaw.
Ki pulit chwa wow kem ya u Vikram da takit ki leh ya 11 ngut kiwi deilang ki bru wa jooh krehlang u.
Neiliang kiwi kiwa chong wa sah ha kani ka Villa Orchids da lai ki leh wow kær kut ya ka Malkajgiri Police Camp yow dawa pynchitom ya uni uwa emkti deiwa e syndon ya oo da ka Death Penalty wei da suba ki leh wa ye u em kiwi de kiwa emkti ha ini wa jia khamtam hawa yoh u wow pynemkaam ya ka SIM Card yong uwi won u Security Guard.
Da pynkuslai leh ya ki hawa ye wow jia kamni ha kani ka thaw sah ki kawa da kær soo dong yow lait kiwa na baar u psiah yow lait u jia kam ini.
Ki pulit da ong ki wa hap bha wow pait kiwa neiwon kiwa thung kreh kam ki Security Guard.
Discussion about this post