Neiliang ka Thma U Rangli Juki (TUR) hawa phah yei jubab heiyatoh wa iwa da khut ka sorkar wow pynsñiaw heiyatoh wa i chna ya ka Shillong Ropeway Project hei lut wa ₹151 klur yow kit ya kiwa uiñke suwari cha Shillong Peak. Ka TUR da pynsñiaw ko yei pyrchah joor deiwa kyrchaan ya ka Joint Action Committee (JAC) kawa da pynman yei yakhih yow dawa pyndam noh ya kani ka Project.
Ki daw wa da e ka TUR toh wa kani ka kaam daw ktah ko ya ka rymaw, ki tyllong um, ki khloo ki kjam wei da leh yeini khlem da pynsñiaw paidbah kamjooh klem da yoh yei kyrchaan ki paidbah wei iwa kam ka sorkar wa dadep wow pyntip cha ki paidbah toh iwa yahbakla heiwa kiwa chong chnong ka Laban Pyllun wa Lum Shyllong kamjooh kiwa chong chnong ka Shillong waroh kawi ym em da tip bniah ki kammon u chna ya kani ka Ropeway wei ym em hi leh ka Public Hearing kawa khooid.
Da kdaw leh wa ki tyllong um em ki ha u Lum Shyllong kawa man kam ka thaw wa pynpoi um cha waroh kawi ka Shillong. Najrong wa dadep wow ah palat 545 tylli ki dieñ iwa ktah leh ya ki umchangpet.
Da ong leh wa i e daw ka sorkar wow wanrah da ka Ropeway toh yow e laad u lai cha Shillong View Point toh iwa bakla neibhah u sarok Upper Shillong toh uwa dadep pynchna 4-Lane iwa da pynsuk yei lai i wan, kamtæ ym emkaam de wow pynlut sa ₹151 klur ka poisa paidbah yow pynsih won ya ki tyllong um.
Wei ym du itæ manda wan ki kari kiwa uiñke suwari cha Laban kawa em ki sarok wa khian daw pynkhynnia ko ya ka chnong ka thaw.
Ka TUR da ong ko wa ka roi ka paar ymtoh du deiwa wanrah i chna i tei i wym yarap iyi iyi ya kiwa chong chnong khamtam deiwa ktah ya ka um wei wow pynjæd leh ya ki khloo wa ki loom ki wah wei iyi wow jia ya kini ki Tower ka Ropeway manda khih u khmi wa khlanbor.
Chooh chooh ka TUR da ong ko wym ngait ko wa daw yoh khih yoh khan ki bru deiwa wanrah ya kani ka Ropeway Project.
Discussion about this post