Chi sngi hadien wa yoh jamin u President wa u General Secretary ka KSU Shillong Mihngi Circle, ynne i miet won u Assistant Organising Secretary ka Khasi Students’ Union (KSU), Central Executive Council (CEC), u Jeremaiah Pohtmi da yoh u mih noh na patok deiwa yoh jamin na ka yung Kasari.
U Jermiah Pohtmi toh uwa chah kem deilang kiwi de kiwa da yoh jamin noh rap hachwa wa kynthup ya kiwa yahkhmat ka KSU kiwa da lait ha ka tayaaw wa dadep kiwa da chah kem ha ki pulit hajrong i mih ka huri hura ha ka Bike Rally ha nongbah Shillong ha ka 19 tarik u Naisaphra 2026.
Da ini, waroh kiwa yahkhmat ka KSU kiwa da chah kem da yoh jamin ki deiwa yoh u mih noh napoh patok tangwa u Vice President ka KSU, u Pynkmenlang Sanmiet da yoh u da ka jamin wa chipor (Interim Bail) neibynta wow lai phah sumaar u.
Neiliang ki dkhot ka KSU hawa pdiang burom ya u Jeremaiah Pohtmi da ong kbai ki leh ki kyntien wa ong wa ka patok man ko ka skurbah.
Discussion about this post