Ka Joint Secretary ka Executive Committee ka chnat Tourism ka sorkar Meghalaya ynne da thoh ko cha u Secretary ka KHADC yow dawa wow khloh noh ya ki Seal wa khang tala wei wow pyndam yei khang ya ka Lower Terminal Point iwa man i thaw kreh pynchna ya ka Shillong Peak Ropeway Project.
Ha ka chithi da ong wa ha ka 27 tarik uni u bnai heipor kamwa 10:30 i step hadooh 12:00 waje pyrdi sngi, ki sahep ka Enforcement Wing ka KHADC hei yahkhmat u Kordor Synrem, Inspector da psiah ki cha ka thaw wa em ka Lower Terminal Point wa em ha Madan Laban wei da phah ki wow mih kiwa kreh wei da khang tala ki ya ka thaw kreh wei da pynkhreh leh ya ka Seizure List yow pynyoo ya iyi de iwa da kem deiwa ong wa da leh yeini hapoh ka Section 7A ka United Khasi-Jaintia Hills District (Trading by Non-Tribals) Regulation, 1954 deilang ka Section 3.
Neiliang ka chnat Tourism da ong ko wa ini i pynchna toh i yong paidbah iwa da leh katkam ka Section 3(1) ka Ropeway Act 2022 heiwa da yoh bor wow leh yeini na ka Ministry of Environment, Forest and Climate Change wei da pynkreh da ka M/s KEC-TCL (JV).
Da pyntip leh wa ka M/s KEC-TCL (JV) kam kawa yoh Contract wa e da ka chnat Tourism da yaleh ki ya ka Trading License nadooh ka 18-05-26 hadien wa da yoh NOC na ka Riat Laban Dorbar Pyllun tangwa sahkut khlem da e Trading License da ka KHADC.
Da pynche leh wa katkam ka Section 30(2) ka Meghalaya Ropeway Act, 2022 wa kamwa man kattæ dang pynkhreh donhi yei kreh wei ym leh ya kayi kayi ka khayi (Trade) kamtæ ym hap wow yaleh Trading License najrong wa ini i thaw wa chah khang man ko ka yong ka sorkar.
Kamtæ da kyntu ya ka KHADC wow looid noh ya ki Seal wa da khang ha u tala ha ka Lower Terminal Point, u pynlait ya waroh ki tiar wa da kem wei wow e dei thoh wa da leh yeini, wei lada ym leh yeini neiliang ka sorkar daw leh ko katkam wa chah ka aiñ yow looid wei kyrriah ya iwon iwon iwa pynthut yei kreh wei ka Council daw hap ko wow bahkhlieh yei dooh nong neiwa pynslem yei kreh.
Discussion about this post