Heiyatoh wa iwa jia ha Iawthymme heiwa da em uwi u dkhar uwa da chah pynbaad tba khlem akor u ya kawi ka khynnah khian hadooh wa poi chei chah dat u ha ki bru paidbah.
Hei takit ki pulit da pyntip wa ha ka 26 tarik uni u bnai da em wa Phone cha u OC ka Jowai Police Station yow pyntip wa em kawi ka khynnah kawa da chah leh khlem akor ha uwi u tre dukan wa em ha Iawthymme, Jowai.
Kamtæ ki pulit da lai ki cha kani ka thaw wa jia heiwa da lai yah ya kani ka khynnah cha ka Women Police Station, katwa ya u chynrang uwa chah pynbaad da rah da ki pulit ka Jowai Police Station.
Manda poi ha Women’s Police Station, kani ka kynthai kawa dang 15 snem kawa na East Jaiñtia Hills da khana ko heipor wa lai ko yow lai booh tiar ha kawi ka Godown ka dukan wa kreh ko wa em ha Iawthymme, Jowai, da jia wa uwi u tre dukan uwa na Bihar uwa emlang ha kani ka Godown da tba u ya ki yimbu ko.
Kamtæ da yah ya kani ka khynnah cha MCH, Panaliar, Jowai yow leh ya ka Medical Examination heiwa ki Doctor da ong ki wa man ko kawa chait wa khiah wei ym em mynsoo ko iyi iyi leh.
Ya uni u Bihari leh da wanrah oo ha Women PS wei hadien da phah wow lai leh ya ka Medical Examination ha Jowai Civil Hospital, Ialong heiwa ki Doctor da ong ki wa da takha u hadien wa chah dat ha ki bru paidbah.
Hadien wa pyndep ya ki Medical Examination, neiliang ka OC ka Women’s PS da kylli takit ko ya ka khynnah deiwa emlang kiwa emyatoh ko kamjooh ya uwa da chah pynbaad.
Hawa kylli, neiliang waroh ar liang da ong ki wa iwa jia ymtoh iwa leh chynnam wei u chynrang da toh thymmoi u ya kani ka khynnah neidaw wa joor ware khynnia kani ka Godown wei ym em mut u iwon iwon i thmu wa sih.
Neiliang kani ka khynnah deilang kiwa emyatoh leh da ong ki wym em kwah ki u lai chakhmat heiyatoh wa ini wa jia heiwa da e ki leh dei thoh.
Discussion about this post