Hadien wa thoh ka Union of Cooks-Cum-Helpers, PM Poshan, Meghalaya cha u Chief Minister ka Assam, u Himanta Biswa Sarma yow yarap klam wa u Prime Minister ka ri, u Narendra Modi heiyatoh wa ka nong (Honorarium) yong ki kamjooh kiwi de kiwa emkaam ki. Neiliang u Himanta da jubab u deiwa phah ya ka chithi cha ka Gina Nengnong, President wa cha u Charles Shongwan, General Secretary ka UCCH PM POSHAN Meghalaya kawa man ka seiñ kiwa chet-ja sngi ya ki skur ki khynnah khian ka jylla wa ka thaaiñ chaneiñ mihsngi ka ri India.
Da e khublei u ya ki heiyatoh wa ka chithi na ka seiñ, kawa da pynsñiaw ya i kyrpaad yow yarap klam wa u Narendra Modi heiyatoh wow pynku noh ya ka Honorarium ka bhah ka sorkar pyrdi kawa da sah la arphaw snem khlem pynku de wa kiwi tawon ki kaam kiwa ktah ya kiwa chet-ja sngi hapoh ka PM POSHAN Scheme.
U Himanta da ong u wa kiwa chet-ja sngi ha ki skur khynnah khian em ki ka bynta kawa khroo bha kawa yarap ya ka rukom baam, rukom dih kawa tei ya ki khynnah khian weiwa ini pynchlur ya ki wow wan skur ki man-ka-sngi.
Chooh chooh da khana u wa ka Honorarium toh kawa da em i kitkhlieh deilang ka sorkar pyrdi wa ki sorkar jylla wei da emkaam bha wow pyrkhat ya kani ka rukom krehkaam katkam wa chah ki kyndon kiwa da em kattæ.
Da yaroh u ya ka seiñ yei yakhun yong ka yow wanrah ya ini i kyrpaad pynku ya ka poisa na ka bhah ka sorkar pyrdi cha kiwa chet-ja sngi ka thaaiñ kamjooh yeiwa pyntip ki leh cha oo yeini deiwa kitbok kitrwiang ya ki ha ini i kaam.
Discussion about this post