Ki dkhot ka Joint Action Committee (JAC) wa pyrchah Ropeway, ynne ka sngi da toor ki cha Secretariat hadooh wa da jan mih i huri hura hadien wa ki pulit da khang ki ya kiwa yakhih wow thom ya iwa da kær (Barrier) wei hadien ki pulit da knieh noh ki ya ki tusok wa wanrah ki yow chong kyllaiñ myngngor hakhmat ka khyrdop.
Neiliang kiwa yakhiah da pyrchang ki wow khyrñiom yeiwa da kær wei pynyieñ mar pyrchah ka khyrdop, heiwa da dawa wa toh u e laad ya ki u chong yakhih hakhmat ka Secretariat.
Ki pulit da yieñ skem ki khlem da e laad heiwa da chim ki ya ki tusok wa da wanrah kiwa yakhih iwa da yah chei yania wa joor bha hapyrdi ki arliang.
Ki kynthai wa yakhih da rahlang ki ya ki Placard yow dawa ya ki 6 ngut ki Waheh Chnong ka Laban wow hiar chuki noh chisiendon wei wow pyndam noh ya ka soskular e wai yei thaw wa da yasoi wa ka chnat Tourism.
Da ong ki leh wa ki kaam uiñke suwari ye wow rah ki cheiwon cheiwon tangwa ki umchangpæd namo ki Catchment Area ym ye wow rah ki wei ki paidbah emkaam ki ya um na Lum Shyllong.
Kiwa yahkhmat ka JAC da ong ki wow nang pynjoor ki yei yakhih hadooh wa ka sorkar u pyndam ko wei kyrriah ko ya kani ka Ropeway Project chawi won ka thaw.
Neiliang ki bor pynlai District heipor kamwa 5:00 waje i janmiet da hukum ki ya ki dkhot ka JAC wow yapra noh nakhmat Secretariat, wei heini da mih biang i pyneh iwa da pynman ya ki pulit wa ki bor District wow kit noh ya kiwa yakhih kiwa boon toh ki manbei ha ki Bus wa da pynyang chwa yow lai booh ki ha ka thaw wa chong yakhih ki hakhmat u mot Kiang Nangbah, tangwa hawa poi ha katai ka thaw ki manbei da kyntait ki wow hiar na ka Bus deiwa kbai wow lai booh biang ya ki hakhmat Secretariat.
Discussion about this post