Ka Kiang Nangbah Government College Jowai lyngba ka Viksit Bharat Initiative ha ka 12 tarik uni u bnai da pynman ko ya ka Youth Parliament ha ka sien wa nyngkong neibynta ki khynnah puræ ka College hajrong ka phang “One Nation, One Election,” deiwa chimbynta mar ar ngut kiwa klam na man kawi pa kawi ka Department wow pynyoo yei sap rukom e ñia katkam i sñiawthooh heiyatoh wa kani ka phang iwa man kam hapoh ka yung dorbar chna aiñ ka ri deiwa em nadooh u Speaker, ka Liang Synchaar wa ka Liang Pyrchah.
Ka thong lyngba kani ka Youth Parliament toh yow pynyaar yei tip i chemphang ha ki khynnah skur heiyatoh wa i rukom pynlai ya ka synchaar khadar paidbah, najrong wow man chlur ki leh u klam paidbah, u yaar i thij i pyrkhat wa i sap man wa yahkhmat.
Chwa u sdang i pynyoo yei sap rukom e ñia wa da sakhilang nadooh ki khynnah puræ kani ka College wa kiwa sikai, neiliang u Neeraj Kumar, Principal ka Jawahar Navodaya Vidyalaya (JNV), Mukhla uwa da wan emlang kam u kongsan, hawa e yei klam da yaroh u ya u Principal kani ka College wa chim u kani ka laad wow pynman ya kani ka Youth Parliament neibynta ki khynnah.
Da pynkynmoo u ya ki khynroo khyllood wa lai puræ wa ki ymtoh du kat u man kitæ kiwa yoh myntoi na i roi i paar ka ri, tang wow man leh kiwa chimbynta neibynta u pynwandur ya ka mynried ka India ha u snem 2047.
Ong u hanla ka ri India da ku ko chakhmat ha ki liang waphær waphær, tangwa emkaam u pynsakhiat yeitæ i ku lyngba i kylla ha i thij pyrkhat wa i rukom im ki paidbah. Deiwa pynkynmoo leh yei kaam wa bha ka ri India heipor ka khlam COVID-19 deiwa yarap ko ya ki ri ka pyrthai.
Hawa klam heiyatoh wa i thmu ka Viksit Bharat, da ban joor u wa yei roi i paar ymtoh u thaw du nei boon ki yung ki sem wada chna næ i ku hei yoh i kot. Tangwa i roi i paar wa sakhiat toh u yoo lyngba i burom yong uwi pa uwi uwa chong chnong, i chngaiñ ki kynthai, i yoh yei puræ puthi wa biang ha ki chnong palatsor wa i ye ki khynroo khyllood u pynkylla yei pyrkhat thymme cha ki laad wow myntoi ka imlang sahlang wa kiwi.
Kyntu e mynsien u leh ya ki khynroo khyllood wa lai puræ wow pyrkhat ki cha baar neiwa jooh myllien im, u man kiwa ye u e khih ya kiwi ym du u man kiwa thooh khih.
U ong u leh wa ki kabu ksiar næ ki hok wan ki ryngkat wa ki kaamram, wei da kdaw u wa kawi na ki chah pynthut wa khroo tam ha ka roi ka paar yong ka ri ymtoh kiwa wan na baar tangwa neidaw wym chimkhia kiwa chong chnong man-ka-sngi hi.
Da pynchlur u leh ya ki khynroo khyllood wow chim ki ka bynta wa emkaam hei wow tei ya ka ri, u man kiwa chlur kiwa tip, u kylli yukylli dei pyrkhat wa chongnia wei ya chimbynta deiwa hok, najrong wym toh leh u kylli hi-eh yi u leh ka ri neibynta yong ki, tangwa toh u pyrkhat yi u leh i neibynta ka ri.
Kiwi won wa klam toh u H.Toi, Principal Kiang Nangbah Government College hawa pynsñiaw yei emkaam kani ka Youth Parliament da kyntu haroh u ya ki khynroo khyllood wa puræ u chim kabu ki ya kawon kawon ka laad ka luti wa wanrah lyngba ki Program waphær waphær.
Wei ong u leh na i boon bru hapoh ka ri kamwa 22% ki khynroo khyllood em ki ka bynta wa kongsan ha i lai luti næ i ku ka ri cha ka Viksit Bharat.
Ha kani ka Youth Parliament da yoh nyngkong da u Odawanlangki Sutnga naka ITEP Department, wa ar u Nibiang Lyngdoh na ka Political Science Department, Morning Section, hei wa le da yoh ka Wymhasa Gympad na ka Zoology Department, wa soo ka Banrishisha Sayoo na ka Economics Department wei hei wa san ka Felynn Erol Lamare na ka Economics Department.
Le ngut napyrdi kini kiwa jop wa kynthup ya u Odawanlangki Sutnga, u Nibiang Lyngdoh wa ka Wymhasa Gympad daw mihkhmat ki ya ka District haka State Level Youth Parliament Competition.
Discussion about this post