Jowai: Ynne i sngi da em i jia wa phylla heiwa arngut ki khynnah kynthai ka wi wa 10 snem i rta (ka mai mai) chirup wa ka beikhian ko (ka dong khian) kawa 12 snem i rta (ka diah yong ka Bei yong ka mai mai) da yut ki na yung du neidaw wow lait ki nei chah tynyap haka bei yong ka mai mai kawa da beh da kdong ki deiwa rah wa ka wait hadien wa da muaid ko.
Kini ki khynnah toh kiwa na ka chnong Tyrshang ka wa haap hapoh ka Ummulong Beat House West Jaiñtia Hills District wei da chem ya ki na Yaawthymme, Ladthalaboh, Jowai.
Katkam wa khana kiwa chong yaaw da yoo ki ya kini ki khynnah heipor kamwa 2-3 waje i sngi heiwa da lai kylli ki na uwi u bru uwa kamai kari na Khliehriat Ladrymbai u C. Phawa, lada daw lai Loomchnong namo ym lai u heiwa da jubab wym lai u, wei hadien ini da uiñ hi-eh ki wah wah neiñ neiñ.
Manda kem rngu da yoo biang u Phawa ki wei da khut u ki chapoh bus neidaw wa da sdang kjam heiwa da kylli u yei chnong yong ki, wei da khut u leh sa ya uwi tawan u wa yah bus wa uwa kit dai uwa sah jan chnong wa ki wow libooh u ki manda liwan u.
Uni uwa kit dai da khut u ki chapoh ka kari kamai Maruti Van kawa juh kit ya ki wa lai wa wan yaaw, wei ki paidbah da sdang kylli ki ya ki wa kammon poi ki cha Jowai heiwa kini ki khynnah da khana ki waroh iwa jia wa chah pynchitom ki ha yung wa da chah dat chah bom ki da chah maham ki ha ka bei ka mai mai kawa muaid waroh chi sngi wei manda sñiaw ki paidbah yeini da rai ki wow yah ya kini ki khynnah cha ka Jowai Police Station.
Manda poi ha thanat da khani kini ki ar ngut wa ka bei ka mai mai muaid ko waroh chi sngi wei da dat ko pyn ya ka beipun yong ka mai mai hadooh wa mynsoo ko kamjooh leh ya ki diah ko wei da leh ko ya kiwi ki kaam pyrchah ya kiwi ki diah wa ki khon ko.
Hei yatoh won wa ynne ka sngi da ong ki wa hadien wa da muaid ko ka bei ka mai mai da kdong ko ya ki khon (ki diah ka mai mai) heiwa da dat ko ki, da dat ko ya ka beipun ko wei neitæ da kdong ko da ka wait wow tynyap ya kini ki ar ngut (ka mai mai wa ka dong khian).
Hadien ini da ku kari ki wow lai cha Jowai deiwa thmu wow lai ki cha Loomchnong cha u pa ka mai mai snem u wa da yakhlaad wa ka bei ka mai mai.
Da khana ki leh wa ym em wa nood ka kani ka manbei hapoh ka chnong wot hadooh kiwa hayung hasem leh nadooh ki chynrang hadooh ki kynthai.
Chooh chooh da khana ki wym tip ki yi wa jia hadien wa da yut ki na yung ynne ka sngi hadien wa rah wait ko.
Hadien wa takit yeini ki pulit da lai ki cha chnong wei da pynkit ki ya ka beipun ka mai mai cha Civil Hospital Ialong yow yoh ko i sumaar.
Neiliang ka chnong dei langær sneiñ ki ya kani ka manyung khlem em iwon iwon i soh i syntu.
Ya kini ki ar ngut da chimkti noh da ka Childline wei dang thooh ya kani ka manbei.
(yei pyrtuid ki khynnah toh iwa sin yow murieh yei pyrtuid tre ki)
Discussion about this post